NAGKUROG nga midangop sa Sta. Ana Police Station ang usa ka babaye nga cashier human alegasyong gisulayan og molestiya sa usa ka welder adlaw nga Biyernes, Enero 18, sa Barangay San Antonio, Agdao District, Davao City.
Subay sa blotter sa Sta. Ana PNP, nailhan ang reklamante nga usa ka alyas Merlyn, 29, cashier, samtang ang lalaki nailhang si alyas Tata.
Giingong samtang nag-duty si Merlyn sa usa ka tindahan, pugsanon nga misulod si Tata ug gisulayan og himas ang pribadong parte sa iyang kalawasan.
Sa maong hitabo, daling nakapangayo og panabang ang biktima hinungdan nga perteng dagan ni Tata, Biyernes sa hapon.
Dugang saysay sa reklamante nga nadugangan ang iyang kasuko gumikan perte ka bati og nawong sa suspek.
“Perte gyod bati-a'g nawong, wala man ko kaila niya, pero ang mga silingan kaila pero nag-rent lang man daw to diha sa amoa dapit,” saysay sa biktima nga naapsan sa SuperBalita sa presinto uno.
Dali sab nga mitaho sa kapulisan ang babaye ug gimandoan kini nga i-report sa barangay aron mapatawag ang atensyon sa gireklamo.