Usbon nato

SA BISAN unsa nga sitwasyon nga ingon sa way solusyon, ang katawhan kinahanglan mangita og paagi aron di mag-antos sa ka inutil sa kagamhanan. Sa suliran sa trapiko, dugay na kaayo kong nag-ingon nga ang biseklita ug motorsiklo managhan pa tungod sa nagkagrabeng suliran sa traffic. Wa ko masayop.

Gawas sa mga habalhabal, daghan usab ang personal nga gamit kay aron di ma-late sa trabaho. Maayo gani usab kay 98 porsyento sa mga drayber sa four-wheeled nga mga sakyanan, magpaagi sa kilid. Nakasabot sila nga ang karsada angay i-share sa tanan.

Apan duna gyuy sibag og mga utok nga tawo. Nagtuo nga sila maoy tag-iya sa karsada. Mas grabe ang among experience sa akong asawa niadtong Huwebes kay ang taxi driver, wa mopaagi sa mga motorsiklo. Iya hinuong gidutdot ang iyang sakyanan sa daplin.

Ako untang hangyuon nga pwede mi moagi. Ako siyang gitan-aw, apan pagbukas na hinuon sa iyang bentana, naningka man og diretso. Kinsa kaha ang di masuko pud kon singkahan kag diretso?

Naluoy ko sa kapin sa 10 ka mga motorsiklo nga diha sa among luyo. Maayo gani nakalubag mi, nakaagi mi diri na sa pikas side. Unya sa pagsaylo namo niya, nibalik mi sa daplin, nakaagi mig tanan hangtod na sa Banilad. Nakaagi ming tanan. Siya ra ang nakababag.

USBON UNTA

Tan-awa, sa usa lang ka tawo nga wa magpaagi, nakaapekto sa dagan sa trapiko. Unta, maghatagay ba og agianan aron di mosamot ang problema. Mao usab ni ang usahay mahitabo anang eskina sa dan Escario ug Gorordo. Dunay mga higayon nga magsiningkahay pa.

Mao unta ni ang batasan sa pipila nato nga angay usbon. Ato bang huna-hunaon nga di kita maoy tag-iya sa karsada. Alang sa tanan ni. Ang atoang buhat makadamay sa kadaghanan. Atong huna-hunaon nga kon ato ning buhaton ang di maayo, unya ikaw ang naigo, unsa kahay imong bation.?

Buot kong ipasabot, kon unsay atoang buhaton, atong balihon ug tugkaron unsay imong bation. Seguradong di ka malipay. Busa, mag-usab kitang tanan sa di maayong buhat.

SINULOG SA BUKID

Kahibawo ko nga kon di uwanon rong adlawa, ang sama nako nga hilig og mountain biking, di malingaw sa patag, magpabukid gyud. Mao ni nahitabo namo niadtong 2012, 56 mi ka buok nga nagpanon sa bukid. Nanga-shock ang mga tawo nga nakakita namo kay daghan kaayo mi.

Hinuon, pag abot sa Barangay Guba, nagbuwag buwag ang uban. Apan kadaghanan namo nanglahos sa sityo Buak.

Maayo untag di mag-uwan kay lami isikad sa Busay. Makaabot kaha ko? Mao nay pangutana nga lisod pa tubagon. Sa akong mga higalang hilig og biseklita, Pit Senyor!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph