ANG Sinulog usa ka celebratory ritual sa mga lumad sa Zubu (ang kanhi pangan sa Sugbo).
Gituohan nga ang mga migrante nga Malay gikan sa Borneo maoy unang nisayaw niini.
Ang ritwal inanay nga nausab sa paghiabot sa mga kastila nga gipangulohan sa Portuguese explorer, Ferdinand Magellan.
Si Magellan giingong nasayup sa iyang direksyon sa paglawig sa kadagatan. Dinhi siya napadpad ug wa tuyoang nadiskubre ang Pilipinas niadtong Marso 16, 1521.
Ang maong expedition niabot sa Sugbo adlawng Dominggo, Abril 7, 1521. Nagsugod ang kristiyanismo dihang gipailaila ni Magellan ang gamayng rebolto ni Senyor Santo Nino isip gasa sa Espanya ngadto kang Haring Humabon ug Rayna Juana, ang mga nangulo sa mga molupyo niadto sa Sugbo.
Si Haring Humabon ug Rayna Juana ang mga unang gibunyagan ni Magellan isip Katoliko.
Ang sayaw nga Sinulog giingong nagsugod dihang nasakit ang sinaligan ni Rajah Humabon nga si Baladhay.
Gimandoan ni Humabon ang iyang mga ka-tribu nga dad-on si Baladhay sa kapilya, diin nahimutang ang balaang batang si Senyor Santo Niño.
Kalit nahigmata si Baladhay ug lagsik nga nisayaw sama sa sulog sa dagat. Wa sad siya kasabot nganong nisayaw siya. Apan iyang gitudlo ang imahen ni Santo Niño nga naa ibabaw sa iyang ulohan nga mao kunoy nag-ayo sa iyang sakit.
Ang Sinulog gikan sa Cebuano adverb nga Sulog nga gihubad sa English nga “like water current movement,” mao nang atras-abante ang sayaw sa Sinulog nga nahimong ritwal na sa mga deboto sa Santo Niño.
Ang labing unang selebrasyon sa Sinulog nahitabo tuig 1980 dihang pipila ka mga grupo sa mga tinun-an sa Sugbo ang nisayaw atol sa kapistahan sa Santo Niño.
Ang Sinulog naila na karon nga inahan sa tanang Festival sa Sugbo nga saulogon kada-ikatulong Dominggo sa Enero.