SUD sa usa ka adlaw lang nga balido ang special permits nga giisyu sa Land Transportation Franchising and Regulatory Board (LTFRB) sa Persano Corporation alang sa pagpabiyahe sa mga unit niini sa habagatang bahin sa siyudad sa Sugbo.
Moabot sa 40 ka modernong bus-jeeps (beeps) ang masakyan sa mga pasahero nga gikan sa temporaryo nga terminal sa Cebu South Bus Terminal sa dan El Pardo, atbang sa El Corso sa South Road Properties sa Dominggo, Enero 20, atol sa Sinulog grand parade.
Sumala ni Eduardo Montealto Jr., regional director sa LTFRB 7, P8 lang ang pletihan sa mga pasahero nga mosakay sa Beeps nga gikan sa south ug mopadung sa south.
Ang rota sa mga modernong public utility jeepney kay gikan sa temporaryo nga terminal paingon sa Compania Maritima duol sa Cebu City Hall ug Basilica Minore del Sto. Niño ug flyover sa Barangay Mambaling ning siyudad.
Sigon ni Montealto, kinahanglan dunay nakabutang nga tarpaulin sa atubangan sa matag beep unit nga dunay nakatatak nga Sinulog ug plate number.
Matod sa director, ang habagatang bahin lang sa siyudad ang ilang giprayoridad sa Beeps sanglit wa mausab ang biyahe sa mga bus sa North Bus Terminal.
Sa pagtawag sa Superbalita Cebu kang Montealto pagka Sabado sa buntag, Enero 19, nagpaabot kini sa ilang rehiyonal nga buhatan sa North Reclamation Area kon dunay mo-apply og special permits nga bus nga molabyog gawas sa ilang rota.
Si Montealto nipasidaan nga pamultahon ang mga operator nga masakpan nga nipabiyahe sa ilang mga units gawas sa naandan nga rota nga way special permit gikan sa ilang buhatan.
Pahamtangan og P50,000 ang operator sa PUJ kon masikop nga nilapas sa rota niini, P200,000 sa van ug P1 milyon sa bus. SCG