GAWAS sa cease and desist order (CDO) nga gipahamtang sa kompaniya nga nilabay sa ilang tubig nga kolor puwa nga ni viral sa social media, tulo ka mga balaod ang nakita sa Environmental Management Bureau (EMB) 7 nga nalapas sa GBox Corrugated Packaging nga anaa mahimutang sa Sitio Litmon, Brgy. Dumlog dakbayan sa Talisay.
Lakip sa kalapasan niini mao ang Philippine Clean Air Act, Philippine Clean Water Act, ug ang Toxic Substances and Hazardous and Nuclear Wastes Control Act of 1990.
Ang GBox Corrugated Packaging naila kaniadto nga PlayG-Tech Trade International Phil’s and Boxmaster Manufacturing.
Nasayran nga ang maong establisemento mogama og corrugated pads, wooden pallets ug material handling equipment susama sa hand pallet truck ug mopaabang og electric kettle.
Base sa imbestigasyon sa EMB 7, ang tubig nga nakit-ang nigawas paingon sa dagat gikan sa ilang inking ug labeling area.
Matod sa tag-iya sa kompaniya, nga tubig uwan ang maong tubig ug tungod kay wala sila’y kaugalingon nga drainage system, nagpundo ang ilang tubig sa dapit.
Hinungdan nga ila kining gi-pump pagawas sa dagat.
Nasuta usab nga nipuwa kini tungod sa water-based nga tinta nga aduna’y sagol nga organic pigments, acrylic resins, alcohol, tubig, ug additives.
Usa kini ka hazardous waste nga kalapasan sa Republic Act 6969, Toxic Substances and Hazardous and Nuclear Wastes Control Act of 1990, hazardous waste number F603.
Tungod kay wala’y wastewater treatment facility ang kompaniya, kalapasan usab kini sa Philippine Clean Water Act.
Aduna’y nasuta usab nga abog ang EMB 7 sa production equipment niini nga kalapasan sa Philippine Clean Air Act.
Nasuta usab sa EMB-7 nga nag-operate nga way discharge permit, permit to operate, ug hazardous waste generator registration.
I-endorse ang kaso niini sa Pollution Adjudication Board (PAB) ug gipatawag kini alang sa Technical Conference aron pagtubag sa mga kalapasan niini.