MOABOT ngadto sa lima ka senatoriable ug usa ka lokal nga kandidato, kinsang tarpaulin gitangtang sa Prevention Restoration Order Beautification Enhancement (PROBE) nga gibutang sa lugar nga maagian sa rota sa Sinulog.
Si Raquel Bohol-Arce niila sa mga kandidato nga naa sa tarpaulin nga silang kanhi PNP Director General Ronald “Bato” dela Rosa nga dunay 20 ka buok; Senador Sonny Angara, dunay 12; Senador Koko Pimentel, dunay 10; kanhi SAP Bong Go, usa; ug ang nag-viral nga dakong tarp ni Gobernaodr Imee Marcos, 6.
Sa lokal, ang gagmay nga tarpaulin ni kanhi Mayor Michael Rama, tulo ka buok. Siya magpapili pagka-bise mayor sa dakbayan sa Sugbo.
Ang mga tarpaulin gitantang sa mga personnel sa Probe nga gipangulohan ni Arce ubos sa kamanduan ni Mayor Tomas Osmeña.
Ang labing dako sa tanang tarpaulin mao kang Marcos nga gibutang sa eskina General Maxilom extension ug New Imus road sa Barangay Carreta.
Kini gibutang kilid sa sidewalk apan giingon nga ang pundasyon niini nasulod na sa pribadong lote.
Apan si Marcos nagpasalamat kang Osmeña.
“Dear Mayor Tommy. Thank you for the reminder and I have asked our supporters to take the tarp down. Meanwhile, Viva Pit Senyor,” text ni Marcos nga gipada ngadto ni Osmeña ug gi-post sa mayor sa iyang social media account.
Ang mayor niingon nga di siya gusto nga masagolan og pulitika ang kasaulogan ug kapisyahan sa Balaang Bata nga si Snr. Sto.Niño karon. (PAC)