BISAN sa hulga sa low pressure area sa Mindanao, wa kini makapugong sa mga deboto sa pagsalmot sa solemn procession sa ika-454 nga kapistahan sa Señor Sto. Niño, pagka Sabado, Enero 19.
Si Cebu City Police Office (CCPO) Director Royina Garma nibanabana nga niabot og 1.5 milyones ang mga tawo nga nikuyog sa 5.6 kilometros nga prosesyon karong tuiga.
Nabantayan ang kahugot sa seguridad atol sa prosesyon tungod sa presensiya sa daghang mga pulis ug sundawo nga nigunit sa pisi ug nibantay sa carroza sa imahen sa Señor Sto. Niño inabagan sa mga tinun-an sa Citizens Army Training (CAT) ug National Service Training Program (NSTP) ug security guards.
Sa unang higayon, ang mga sakop sa Police Regional Office (PRO) 7 ang nag-una sa carroza sa Señor Sto. Niño nga nagporma og walo ka linya pinangulohan sa ilang director nga si Chief Supt. Debold Sinas.
Ala 1 sa hapon, nibiya ang carroza sa Basilica Minore del Sto. Niño nga giluwanan sa imahen sa Señor Sto. Niño nga gisud og glass case. Ug nisubay ang prosesyon sa mga karsada sa Osmeña Blvd., dan P. Burgos, dan F. Urdaneta, M.J. Cuenco Avenue., dan Imus, Gen. Maxilom Ave., balik sa Osmeña Blvd ug Basilica sa siyudad sa Sugbo.
Human sa upat ka oras, nabalik ang carroza sa Basilica alas 5 sa hapon. Matod ni Garma, epektibo ang pag-shut-off sa signal sa mga cellphone.
“Na-prevent natin ang mga posibleng mangyari,” sumala ni Garma sa pakighinabi sa mga tigbalita. Mao usab kini ang nakita ni Fr. Ric Anthony Reyes, head sa secretariat committee.
“So far the solemn procession has been done successfully. Maayo ang panahon, walay major nga mga problema tang nasugat," chat niya sa Superbalita Cebu.
Gipawong
Ang National Telecommunications Commission (NTC) 7 niaprobar sa hangyo sa kapulisan nga pagngon ang signal sa mga cellphone sa pipila ka mga dapit sa mga dakbayan sa Sugbo, Mandaue ug Lapu-Lapu atol sa seaborne ug solemn processions pagka Sabado, Enero 19 ug Sinulog grand parade sa Dominggo, Enero 20.
Nagsugod ang signal shut-off alas 3 sa kaadlawon hangtod sa alas 10 sa buntag atol sa seaborne procession ug napawong og balik pagka alas 12 sa udto hangtod alas 8 sa gabii.
Way natala nga dagkong mga insidente atol sa balaang kalihukan, gawas lang sa mga tawo nga nisingit ug gusto mosud sa linya sa prosesyon.
Wa usab mag-uwan kagahapon diin ang kalangitan niduyog sa prosesyon ug dili usab init ang silaw sa adlaw.
Dunay mga higayon nga nihunong og kadiyot ang carroza tungod kay gipadaplin una ang mga tawo sa karsada, ug napawong ang tingog sa speaker niini.
Si Eufronia Pata, 69, taga Davao City, sud na sa lima ka tuig nga nag-pilgrimage sa Sugbo kuyog ang iyang mga kauban sa ilang pundok, ang Holy Family Prayer Group, nga iatol nila sa matag kapistahan sa milagrusong bata sa Enero.
Nagsugod ang iyang debosyon sa Señor Sto. Niño niadtong 2006, dihang ang iyang anak nga lalake nagsakit og lung cancer.
Niadtong 2010, namatay ang iyang anak, apan bisan sa maong pagsuway, mas nihugot ang iyang pagsalig sa balaang bata. “Ako na ning panaad Niya matag tuig,” dugang ni Pata nga usa sa mga niapil sa solemn procession.
Niadtong Enero 17, nahiabot sa Sugbo si Pata uban ang 16 ka mga miyembro sa ilang kapunungan ug niduaw sila sa pito ka mga simbahan ug chapel.
Apil na niini ang Basilica, National Shrine of the Virgin of the Rule sa Lapu-Lapu, St. Benedict Monastery sa lungsod sa Carmen, Chapel of San Pedro Calungsod sa South Road Properties, St. Therese of the Child Jesus Parish sa Lahug, Archdiocesan Shrine of Our Lady of Guadalupe ug Monastery of the Holy Eucharist kun Simala Shrine.