LAKIP na ang Northern Cebu sa gipaubos sa Storm Signal No. 1.
Alas 5, Dominggo sa kaadlawon nalakip ang Northern Cebu sa Tropical Cyclone Warning Signal (TCWS) Number 1 tungod sa Tropical Depression Amang.
Lakip sa giisa sa TCWS Signal Number 1 ang Eastern Samar, Samar, Biliran, Leyte, Southern Leyte, ug Bohol.
Sa Mindanao, ang Agusan del Sur, Agusandel Norte, Surigao del Sur, Surigao del Norte, Dinagat Island, ug Camiguin ang giisa gihapon sa TCWS Signal Number 1.
Gitug-an ni Jhomer Eclarino, ang weather specialist sa Pagasa Mactan (Philippine Atmospheric, Geophysical, Astronomical Services Administration), nga mga pagtutaligsik lang ang masinati karong buntag, uban ang madag-umon nga panahon.
Apan sa hapon hangtud sa gabii, posibleng masinati na ang mga hinay ngadto sa kasarangan ug usahay kusog nga pag-ulan.
Ang bagyong Amang, nga gikan sa low pressure area sa pagsud sa nasud, hingpit nga nahimong tropical depression alas 10 Sabado sa gabii, Enero 18.
Kasamtangan anaa sa East sa Hinatuan, Surigao del Sur ang bagyo, ug nag-irog kini kasadpan amihanang kasadpan sa 25 kilometro matag takna sa Surigao del Norte. (FMD)