BAGUIO

Luzano: Kayam kadi ti magna nga awanan security?

Karit Ken Kayetket

DAYTA ti nadagsen a KARIT ni Novaliches Bishop EmeritusTeodoro Bacani Jr. kenni Presidente Rodrigo Duterte itay nabiit: kabaelan ngata ni Digong ti magna iti lansangan nga agsulsulo wenno awanan security? No intay anagen a naimbag dagita a ramen ti karit....adda nadagsen a makagapu, saan ngata kailian? Kunada...amangan ta magmagsaten ti sintas dagiti taga-simbaan katolika gapu kadagiti agsisipul ken agdidippit a basnot ni Digong kadakuada.

Adda met nagkuna: tao laeng uray pa obispoda....addaan puso a mangrikna ken addaan met karbengan a marurod. Kuna met dagiti dadduma nga analista: adu ngaminen dagiti nararasaw a komento ni Presidente Duterte ti pinalabas dagiti papadi. Nadanonda siguron ti maudi nga uged ni pasensiya isu a bimmasnoten ni Bacani. Ala, subliantayo a sirigen ken puntingen ti nakuna a kontrobersiya ngem intay man biit padaplisan pay dagiti sumagmamano nga isyu iti kallabes:

***

Pudno ken di matawaran ti napapigsa a kampanya ti otoridad kontra illegal a droga. Inaldaw nga adda dagiti maar-aresto. Adda met dagiti mapadso gapu ta limmaban kas kuna dagiti report. Ngem iti likud ti nadagsen a pannusa, kasla adu latta dagiti di agamak. Adu latta dagiti map-appot gapu iti illegal a droga. Kalaksidan iti pannakaappot dagiti laboratoryo nga imatmatonan dagiti gangannaet ken pannakaipila iti kaskenan a kaso kontra kadagiti maatap...adu latta dagiti subeg a di agbuteng iti linteg.

Kinapudnona, iti kaudian a raid nga inaramid ti PDEA itay nabiit sadiay Navotas Fish Port...duapulo ket walo katao ti natiliwda. Sangapulo ket dua dita ti menor de edad nga agtawen laeng iti uppat agingga’t kinse.

Sus maryusep!

Naammuan dagiti taga-PDEA a dagiti menor de edad ti ar-aramiaten dagiti sindikato a kas runner iti illegal a droga gapu ta ammoda a makalusot dagitoy iti kaso a kriminal uray maappotda. Maar-aramat pay dagiti ubbing a kas mangimatmaton kadagiti barong-barong a pagurayan da kadagiti parokyano. Ti paitna, agar-aramatda metten iti droga dagitoy kagiddan dagiti parukyanoda. Maryusep...ubbingda pay laeng ngem gapu iti aramid dagita a sindikato...nadadaelen ti masakbayanda.

Sapay koma ta dipay nagabay ti amin. Malagip tayo manen ti eksena ti maysa a raid itay nabiit nga agassawa dagiti supplier wenno pusher iti illegal a droga iti maysa a barangay. Uray dagiti annakda, nasursuruanen iti illegal nga aramid. Kasanon ti pangta idi ni Pres. Duterte: “huwag sirain ang kabataan dahil papatayin ko kayo!”. Kasano apo a dika sangduen dagita nga ubbing ket isudan ti sumangsangdo imbes koma a namnama ti pagilian.

Malagiptayo manen ti daplisda: masapul a maamendaran koma ti linteg a kas kalasag dagiti menor de edad tapno saanda a maaramat iti illegal a banag.

***

Imbag laketdin ta nasirip dagiti mannirip este nasisirib a mammanday-lintegtayo ti gistay limsuten a P75Bilyones a kuarta dagiti umili manipud iti P332 Bilyones a “flood control fund” kano a nakaisab-itan ti nagan ni Budget Sec. Benjamin Diokno. Imbag laketdi kanon ta bimmasnot ni Majority Leader Camarines Sur Rep. Rolando Andaya a nangkuwestiyon iti P75Bilyones a pundo para kano iti flood control ngem ti nakailatangan ti nakuna a kuarta ti ili ket kadagiti met disso a saan met a malaylayus. Insingit kayo daytoy ti sekretaryo a mangpabor kadagiti manokda a kontratista.

Gapu iti panangibutaktak ni Rep. Andaya, nagtignay a sigida ti Senado ket inikkatda ti nakuna a bilyones ket inlatangda laengen daytoy kadagiti programa panggep iti salun-at ken dadduma pay nga agkasapulan iti pundo iti agdama. Tsk tsk...’nia metten a klase ti palusot. No saan a naduptalan ti nakuna nga aramid, sayang manen ti pirak a nagrigrigatan dagiti umili.

Mapan laeng iti bulsa dagiti buwakaw a buwaya manipud gobyerno ken kakutsabada a kontratista. Masapul a maimbistigaran a naimbag ti nakuna nga anomaly ken masapul a mapatawan iti pannusa dagiti nagbasol.

***

Itay manen nabiit, adda lima nga opisyales ti PNP-Bacolod ti inorderan ni Pres. Duterte a maikkat iti puwesto gapu ta protektorda kano iti illegal a droga. Nainaganan amin dagitoy manipud hepeda agingga kadagiti uppat a taona. Ngem kalpasan a nasibak dagitoy iti puwestoda a sinaruno ti rumbeng nga imbestigasyon, kinuna ti PDEA nga awan iti recordsda a karaman dagiti lima a pulis iti isyu ti illegal a droga sadiay Bacolod City. Nagduduma a reaksiyon ti simmaruno. No sibibiag laeng daydi lolok...amangan ta isun ti immuna a nagkomento.

Mabalin a makunana: “Amangan ta adda laeng simmipsip kenni Apo presidente. Pinatida metten. Imbes a maimbistigaran nga immuna, saan ta naikkatda pay iti puwestoda. Nainaganandan, natural...ammon ti sangalubongan ti burikda a dinadael dagiti sipsip. Kaasida met no awan basolda. Dagiti koma sipsip ti inda kastigwen ken dusaen, saan aya?”

He he...adda puntos daydi lolok, kabsat. Nakaam-amak nga agpayso dagiti posibilidad a mabalin a kayatda laeng ti agpalapad iti papelda kenni Pres. Duterte...ket ti la adda ditan a maisipsipsipda. Ti la adda ditan a maipulpulongda uray saan met a pudno. Kayatda laeng ti mangdadael iti tao wenno kayatda a balsen ti kabusorda.

Ti imasna met no namati ni presidente...natural, kugtar kada kugsil a sigida ti mapasamak. Piman met dagiti biktima ti tsismis. Daplis: di koma mamati a sigida kadagiti tsismis wenno sipsip ta di kaasi met piman dagiti madadaelan iti dignidad a tattao nga awan met pakainaiganda iti na-tsismis a pammabasol.

***

Iti pannakaisursurat daytoy nga espasyo...agsango pay laeng da sen. Manny Pacman Paquiao ken ni American challenger adrien Broner. Bayat iti panagbasbasayo iti daytoy a kolum, addan nangabak. Kas maysa a Pilipino...agyankami latta kenni Pacman, aniaman ti mapasamak. Ngem ad-adu ti mangur-uray iti Pacman-Mayweather fight iti agdama. Ngem ti saludsod ket no matuloy ngata ti nakuna a rematch? Kuwarentay dosen ni Mayweather idinto ta kuwarenta met ni Pacman. Mabalin pay, kunada. Sige, urayentayo. Ngem mapasamak laeng dayta depende iti resulta ti Pacman-Broner fight saan aya?

***

Ala, subliantaon da Digong ken Bacani panggep iti karit ti Obispo. Kinarit ni Bishop Bacani ni Apo Digong a magna nga agmaymaysa ken awanan security. Karit iti kinatured ni Digong ti inaramid ni Bacani. Sungbat met ni Presidential Spokesman Salvador Panelo a saan a mabalin a tutupan ni Pres. Duterte ti karit agsipud ta adda Security Protocol tapno masiguro a manayon nga adayo iti disgrasya ti biag ti maysa a presidente kangrunaan iti amin a rason ket ti akmenna a mangidaulo iti pagilian ken mangsolbar kadagiti amin a parikut ti estado. Innayon pay ni Panelo a nasuboken ti kinatured ni Digong idi mayor pay laeng idiay Davao City.

Agmaymaysa a rumaraut ken mangar-aresto kadagiti kriminal. Saludsod: adda pay ngata dagiti sumaganad a binnasnutan iti baet ti simbaan-katolika ken ni Pres. Duterte nangruna ta umadanin ti panagkakampanya para iti eleksiyon 2019?

Iti likud dagiti pammasagid a kasla adda kano planon ni Digong a makisango ken makisarita kadagiti taga-CBCP....agpangadua pay laeng dagiti dadduma a nakasursurot kadagiti binnasnutan ti dua a kuta. Kasla kano adayo a mapasamak ti rekonsilyasyon kadagitoy a panawen. Ngem no mapasamak dayta, saan a dakes....no di ketdi ditanton ti pagturposan ti nabayagen a sigalot. Ditanton a maisa ti wagayway ti panagkaykaysa, rinnispeto ken tinnulong para iti masakbayan.

Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph