NANGHUNAW karon ang Davao del Sur Electric Cooperative (Dasureco) nga wa silay labot sa matag adlaw nga brown-out sa probinsya sa Davao del Sur.

Gitudlo sa Dasureco ang National Grid Corporation of the Philippines (NGCP) nga maoy hinungdan sa way abiso nga pagkapawong sa kuryente sa bisan asang parte sa probinsya.

Ang sekretarya ni Dasureco manager Engr. Jesus Dela Victoria nga si Glomarie nagkanayon sa Sun. Star Superbalita nga wa silay mahimo ugaling kalit nga mawagtang ang kuryente.

Sa pagsubay sa Superbalita, aminado ang NGCP nga hinay kaayo ang supply sa kuryente gumikan kay nihubas ang tubig didto sa Lanao.

Usa ka wa magpailang operator sa NGCP sanglit di siya otorisadong mamulong nagkanayon nga nasinati karon ang di tarong nga serbisyo sa kuryente nunot sa maong suliran.

Apan matod nila nga ang Dasureco gihapon ang mag-kontrol sa mga dapit nga angay pawngon ang kuryente.

"Dasureco man gyud ang kontrol ana kay wala mi gipalong nga linya. Sa ilaha ang feder ana," sigon sa NGCP nga nakabase sa lungsod sa Matanao, Davao del Sur.

Unang nireklamo ang mga myembro sa Dasureco sanglit daghan na sa ilang mga appliances ang naguba atol sa kalit nga pagkapawong sa kuryente.

Hinuon gipasalig sa Dasureco nga pangitaan og solusyon ang maong suliran aron di kini makaapekto sa taliabot nga eleksyon karong Mayo.

Tungod sa taho nga nikupos na ang tubig gikan sa probinsya sa Lanao, Del Norte diin nanukad ang dakong supply sa kuryente daghan karon ang nabalaka nga padayon na gyud masinati ang maong suliran.

Gumikan niini daghan karon ang nangutana kung hayan mapuslan pa ang coal plant sa Misamis Oriental ug ang geothermal plant didto sa siyudad sa Kidapawan. (Orlando B. Dinoy)