MOABOT ngadto sa 2.5 ka milyon ka mga tawo ang misaksi sa Sinulog grand parade 2019.
Kini ang estimate ni Police Regional Office (PRO)-Central Visayas director Chief Superintendent Debold Sinas sigun sa iyang nakita sa gipangmontar nga mga CCTV camera sa mga rota sa Sinulog.
Mas daghan kini itandi sa 2018 diin mabantayan nga nagdasok ang mga tawo nga bisan ang mga pulis, mga sakop sa Central Command ug mga volunteers halos dili na makapugong sa mga tawo nga gustong molabang.
Bisan ang hepe sa Cebu City Police Office (CCPO) Senior Superintendent Royina Garma, kinsa maoy ground commander sa security sa Sinulog, nangunay na sa pagbadlong sa mga tawo nga dili na mapugngan nga magpatunga na sa dalan.
Sa may Fuente Osmena Rotunda nagpatabang na ang CCPO ug mga guwardya sa mga establisyemento aron lang mabadlong ang mga tawo nga moagi sa tunga kay sila nakabalda na sa mga contingent.
“Among gitan-aw sa CCTV almost all areas puno kaayo ang mga Tao, ” matod ni Sinas.
Midagsa ang bagang duot sa mga tawo niana nang pagkahapon nga bisan sa pagbunok sa uwan.
Sa monitoring sa Advance Command Post sa Cebu City Sports Center, nakita nga naglisod ang crowd control personnel nga mobadlong sa mga tawo.
Dali nga nigawas si Sinas aron siya na mismo ang mobadlong sa mga nanglabang sa karsada.
Sa kinatibuk-an, gihulagway ni Sinas nga malinawon ang Sinulog karong tuiga nga walay insidente nga natala nga may kalabotan sa kalihukan sa Sinulog.
Gawas lang sa mga nabiktima sa mga pickpocket kinsa nagtapok sa Abellana police station.
"Generally peaceful, walay stampede, walay tinudlanay. Of course naay nag-collapse siguro walay kaon sa sayo pa unya behaved pud ang audience naa lay time nga kung malipat ang pulis ilang abusohan, ” matod ni Sinas.
Adunay usa ang gidakop sa gawas sa Cebu City Sports Center nga namaligya og ID sa grandstand nga wala itugot sa Sinulog Foundation Inc.
Ang nasikop giila nga si Hanibal Socorro, taga barangay Ermita, Cebu City. Nakuha gikan ni Socorro ang mga ID nga adunay marka nga complimentary nga iyang gibaligya og tag P700.
"Ako nang pinalit niya, ibaligya sad nako og tag P700,” matod ni Socorro.
Nasikop usab si Elmer Terzio, 57, nga taga Dipolog City nga padung na nga manguot sa usa ka babaye nga naa sa bleacher sa grandstand. Nakit-an kini sa pulis ug giposasan ug gidala sa Abellana police station. (AYB)