KINAKUSGAN nga siyagit nga mabati sa kapistahan ni Senyor Santo Niño mao ang mga pasalamat sa daghang grasya nga nadawat.
May siyagit nga mabati gikan sa baba sa mga deboto. Og may mga siyagit nga gikan sa kahiladman.
Tinuod ang nakita sa ubang nisalmot sa solemn procession niadtong Sabado nga may nanghilak nga mga deboto.
Usa sa nisalmot niingon wa tuyoa nga nakahilak siya sa diha nga niagi saciyangvtyngod ang karo nga nahimutangan sa balaan nga bata.
Duna say niingon nga nitulo ang iyang luha samtang niapil sa pagkanta sa labing halandumon og makapakitbi sa atay nga awit nga mao ang Bato Balani sa Gugma. Way magbuot kong unsa ang imong pangayoon sa Balaang Bata.
Ang gipaambit hinuon sa uban nga mas naglabi ang ilang mga pangaliya di lang sa ilang kaugalingon mas labaw pa ang paghangyo kang Senyor Santo Niño nga iyang ayohon ang mga masakiton, ilayo sa kadautan ang katawhan batok sa bisan unsa nga katalagman, bangonon ang mga biktima sa bagyo, landslide, sunog, og kadtong nag-antos sa tumang kasub-anan ksy biktima sa krimen og mga pinansiyal nga panginahanglan.
Nakaingon ko nga kanindit sa ilang mga petisyon gisiguro nila ang ubang tawo kay sa ilang kaugalingon.
***
Sa unang higayon nasaksihan sa mga tawo ang pagbaha sa mga polis nga nikuyog sa solemn procession.
Gawas sa ilang debosyon ngadto kang Santo Niño may lain pa sila nga misyon sa naong kalihukan nga mao ang pagsiguro nga way aberya ang procession kong siguridad ang hisgutan. Unta mao sab ni ang template di lang sa Piyesta Senyor apil na sa ubang kapistahan diin ipahigayon ang relihiyosong kalihukan.
Akong nakita nga epiktibo kini nga paagi pagpadangat og mensahi ngadto sa mga gustong magpabadlong nga ang PNP andam makigtakos ni bisan kinsa nga mosupak sa balaod.
Labaw sa tanan ang pagpalig-on sa intelligence network nga maoy maisip nga labing importanting hinagiban matag adlaw nga tanan may piyesta man o wala.
Di sayon ang pagbantay og dul-an sa duha ka milyon ka mga tawo nga nisalmot sa solemn procession.
Mao kadto ang pinaka daghan sa kasaysayan. Bisan gani ang fluvial procession. Nireport ang Coastguard nga wa kaabot sa usa ka gatos ang nagparehistro pero sa ilang ihap sa pagsugod na og lawig sa galleon subra sa dosentos ka mga sakyanan sa dagat ang nitadlas sa Mactan Channel.
***
May aberya man o wala atong pasalamatan ang atong kaugalingon, gobyernong lokal og national, kaparian og mga nag-alagad sa Badilica Minore del Santo Niño,
Sinulog Foundation, mga choreographer, dancer, nag-andam sa props og mga organizers sa laing makasasayanon nga kapistahan.
Ang mga bisita salamat sa pagbiyahe og labaw sa tanan kang Senyor Santo Niño sa grasya sa kinabuhi.