USA ka politiko nga nangampanya niduskurso bahin sa iyang plataporma de gobyerno. Matod pa niya, “Kon inyo akong buligan ug padag-on pagkamayor sa umaabot nga eleksyon, patukoran ta kamog tulay.”
Nisiyagit ang mga tawo, “Unya, Nyor, wa man mi sapa diri.” Matod pas kandidato, “Aw di lang nato dunganon. Sa sunod na la nang sapa. Ato lang unahon ang tulay.” Mao kanang dunay mga tulay nga wa mahuman kay way sapa.
Matod pa ni Nikita Khrushchev, kanhi primero ministro sa kanhi Soviet Union nga nahimo na karong Russian Federation, “Politicians are the same all over. They promise to build bridges even when there are no rivers.”
***
Kon mosaad ang mga politiko nga magtukod og tulay bisan way sapa, mas grabe pa ang nahitabo sa lungsod sa Prieto Diaz sa lalawigan sa Sorsogon. Nagtukod silag flood control mitigation alang sa sapa nga wa pa diha.
Gibutyag kini ni House Majority Leader Rolando Andaya Jr. sa hearing sa House of Representatives bahin sa binilyon ka pesos nga “insertions” sa P3.8 trilyones nga national budget sa 2019.
Matod pa ni Andaya, “This is the worst. A flood control project for a river has been started while they are still waiting for the river to be there.” Wa nay kabalak-an ang mga tawo nga nagpuyo didto kon simbako mokalit lag tunga ang sapa.
***
Sinulog gipamolitika? Gipatangtang ni Cebu City Mayor Tomas Osmena ang mga tarpaulin nga nagbandera sa nawong sa lima ka mga politiko nga gibutang sa mga lugar nga maagian sa rota sa Sinulog grand parade.
Si Raquel Bohol-Arce, pangulo sa Prevention Restoration Order Beautification Enhancement (PROBE) sa syudad sa Sugbo, niingon nga nakatangtang silag 20 ka tarpaulin ni kanhi PNP Chief Ronald “Bato” dela Rosa, 12 kang Senador Sonny Angara, 10 kang Senador Koko Pimentel, usa kang kanhi SAP Bong Go, unom kang Gobernador Imee Marcos ug tulo ka gagmay nga tarpaulin ni kanhi Mayor Michael Rama.
Anugon kay daghan ra ba unta kaayong mga tawo ang nisaksi sa Sinulog. Ibalik lang nag taod human sa Sinulog.