WALA makahunat ang bagyong ‘Amang’ nga nisulod sa Philippine Area of Responsibility (PAR) niadtong Sabado, Enero 19, bisan ang amihanan sa Sugbo gipaubos sa signal no. 1 kagahapon, Enero 20. diin una kining gibanabana nga magdala og kusog nga uwan sa tibuok Sugbo lakip sa ubang bahin sa Tungatungang Kabisay-an.
Apan sulagma kaha o milagro ni Senyor Santo Niño? Ang naghulga nga nadautang panahon wa mobwelo. Igo lang nakauwan og gamay o habobaho sa udto nga wala makaguba sa mga kalihokan sa pista sa Senyor sama sa Sinulog Grand Parada ug hinuon, naghatag kini og og paborableng panahon human dili init sa tibuok adlaw labina sa street dancers ug mga minilyong katawhan nga nanuroy sa kadalanan sa dakbayan.
Mapasalamaton kita sa milagrusong bata sa Sugbo, Sto. Niño, nga nagmalampuson ug malinawon ang tanang kalihokan sa iyang kapistahan. Walay dagkong panghitabo nga natala sa tanang presinto sa Cebu City Police Office (CCPO) gawas sa gamay nga kaguliyang sa pagkawala sa crowd control sa pipila ka dapit sa rota sa Sinulog Grand Parade.
Ang komon nga yawyaw sa kadaghanan mao ang pagkawala sa komunikasyon sa tanang networks sa ilang pagputol sa signal. Apan masabtang lang usab nato kini tungod sa pagseguro sa kaluwasan sa tanan. Ang pagpakabana sa seguridad motigbabaw sa tanan.
Matag tuig nga pagpahigayon sa Sinulog kanunay nagsaka ang gidaghanon sa mga tawo nga mohugpa alang sa dakong kasaulogan sa Sugbo. Usa kini sa dayag nga milagro sa Sto. Niño sa Sugbo. Matag tuig managlahi usab ang leksiyon nga makuha sa pagpalambo sa tradisyo nga Sugbuanon.
Samtang, si ‘Amang’ padayong naghulga ug seguro mobuga na kini sa iyang pwersa human na sa dakong kalihokan sa pista. Pit, Senyor! Kaluwasan sa tanan!