MIREKLAMO ang usa ka operator og bus sa lalawigan sa Sugbo sa lagda nga gipatuman sa Land Transportation Franchising and Regulatory Board (LTFRB) kalabot sa mandatory franchise consolidation.
Si Julito Flores, chairman sa Cebu Provincial Bus and Mini Bus Operators Transport Cooperative, wa makauyon sa lagda sa LTFRB tungod kay kon dili makaabot og 10 ka units sa bus sa usa ka rota ang operator sama niya o single proprietor, dili kini maka-avail sa consolidation sa prangkisa.
Siya niduso na unta og aplikasyon sa rehiyonal nga buhatan sa LTFRB 7 pagka Biyernes alang sa consolidation sa prangkisa sa usa ka rota sa habagatang Sugbo, gamit ang bag-o ug moderno nga mga bus nga iyang gipalit, apan wa dawata gumikan kay wa makaabot og 10 ka units sa bus.
“Unsaon nako pag 10 units nga kakompetensya man nako ang operator...” pahayag ni Flores.
Matod niya, aduna siya’y kinatibuk-ang 17 ka units apan kini naa sa lainlaing mga rota.
Si LTFRB 7 Director Eduardo Montealto Jr. namahayag nga mangayo siya og resolusyon sa ilang ulohang buhatan aron masolusyonan ang reklamo ni Flores sanglit ni-exist na ang rota nga gi-apply niini.
"Kay ako naman to gipasaligan nga kon di ma-solve didto sa Manila, then naa naman ka interested naman ka mo-file og consolidation, ako lay desisyon,” matod ni LTFRB 7 Director Eduardo Montealto Jr.
Siya nipasabot nga ubos sa Memorandum Circular 2018-008 kun Consolidation of Franchise Holders in Compliance with the Omnibus Franchising Guidelines, kon nag-inusara ra ang operator sa usa ka rota kinahanglan dili moubos sa 10 ka units ang bus niini aron ma-consolidate ang mga prangkisa samtang 15 ka units kon public utility jeepneys. Ug ang moisyu og permit kay ang Department of Trade and Industry (DTI).
Sa samang lagda, kon kooperatiba, 15 ka units sa bus ug minimum sa 15 ka mga miyembro ang kinahanglanon alang sa consolidation.
Kon korporasyon, 15 ka units usab sa bus ug 15 ka units sa PUJ ang kinahanglanon alang sa consolidation ug ang Securities and Exchange Commission (SEC) ang moisyu sa permit. (SCG)