KON walay giisa nga storm signal ang Pagasa sa Metro Cebu karon, mga tinun-an pagsayo kamo og mata kay dunay klase bisan kon gikapoy kamo human sa gipahigayon nga Sinulog kagahapon.
Si Mayor Tomas Osmeña nagkanayon nga bisan kadtong mga eskwlehan nga maoy giistaran sa mga out of town contingents ug kadtong nagagikan sa lalawigan sa Sugbo magpadayon ang klase.
“ I am not authorize to cancel that..” padayag ni Osmeña may labot sa pangutana kon angayan bang suspensuhon ang klase gumikan sa Sinulog.
Lakip sa gihimong billeting center mao ang City Central School, Abellana National School, Regino Mercado Memorial School ug Labangon Elementary School.
Ang Cebu City adunay 13 ka mga barangay ang ningsalmot sa Sinulog Festival diin sagad sa ilang mga dancer pulos mga estudyante sa elementary o high school.
Ang mayor niingon nga makasuspenso lang siya sa klase kon adunay mga emerhensiya subay sa Republic Act 10121.
“Unless there will be typhoon tonight, I can suspend classes,” padayag sa mayor sa interbyu kagahapon.
Ang Cebu City adunay 80 ka barangay diin sagad kanila adunay mga public elementary ug high school nga gilangkuban sa kapin o kulang 180,000 ka mga tinun-an ug gidumala sa kapin 5,000 ka mga magtutudlo. (PAC)