DUL-AN usa ka milyon ka tawo ang ningsalmot sa Pontifical Mass nga gipahigayon sa Basilica Minore de Santo Niño kagahapon sa kaadlawon, Enero 20, atol sa pista ni Sr. Sto Niño.
Gipangulohan ni Archbishop Jose Palma ang maong misa.
Nagpasalamat si Archbishop Palma nga bisan sa hulga sa bagyo nga masinati sa kapistahan sa senyor, wala kini nahimo nga babag alang sa mga tawo nga misalmot sa mga misa sa Basilica ug sa solemn procession niadtong Sabado, Enero 19.
Sa iyang wali sa misa, iyang gipatugbaw ang mahitungod sa grabe nga debosyon sa mga Cebuano sa balaan na bata.
“Kining bata nga natawo sa pasongan, atong gidawat sa atong mga altar ug ninyong tanan, sa matag balay adunay image ni Senior Santo Niño. Daghang kaayong salamat kay mao kana inyong gipakita sa atong pagtuo,” sigon sa Archbishop.
Si Selva Dagatan, 51, taga lungsod sa Danao, niingon nga kini panaad na nila kang Senior Santo Niño ang mosalmot sa misa sa iyang kapistahan isip pagpasalamat.
“O, mao gyud na among saad kay last year nasakit ko nya karon nga tuig, naayo man gyud mi tungod sa iyang milagro. maong amo gyud nang saaran. Amo gyud ning tumanon among mga saad kay tungod sa mga milagro ni Senior Santo Niño,” saysay niya.
Kuyog ni Dagatan ang iyang tibuok pamilya ug sila nagbawon pa sa ilang makaon aron di sila gutomon.
Ang panaad nila naggikan pa sa ilang mga katigulangan kinsa deboto kaayo kang Senior Santo Niño.
Dungag niya nga iyang ampo ngadto sa balaang bata mao ang maayong panglawas sa iyang tibuok pamilya ug ang makahuman sa pag eskwela ang iyang duha ka anak.
Matod ni Carminisita Monseda, 53, taga lungsod sa Dalaguete nga gituyo nila og ari maski sa kalayo sa ilaha tungod kay kini panata na nila taga tuig.
“Akong pag-ampo ngadto kang Senior Santo Niño kay hatagan ug taas nga kinabuhi, mayng panglawas ug kalinaw sa Pilipinas,” saysay niya ngadto sa Superbalita.
Si Juanito Panumdim Jr., 36, taga Malabuyoc, kinsa kuyog ang iyang tibuok pamilya miingon nga taga tuig na gyud sila mag-arian taga Sinulog tungod kini ila nang panaad.
“Ang ako lang gipangayo sa Senior Santo Niño nga may mig lawas permi, nga kaluy-an mi kada adlaw sa among panginabuhi, sa panarbaho sa taga adlaw tanan, dungan namo among mga pag-ampo permi sa Senior Santo Niño,” dason niya. (Jolissa Mae Taboada, USJ-R Intern)