SA linghod nga pangidaron, katambayayong na si Christian Kate Reducto sa iyang apohan nga babaye nga si Arsenia Fuentes, 64, sa pagpamaligya og mga kawo ug mga paypay atol sa Sinulog grand parade pagka Dominggo, Enero 20.
Matod ni Arsenia, 4 anyos pa lang ang edad ni Christian, kini na ang kanunay niya gikauban sa pagpanginabuhi sa matag kapistahan sa Señor Sto. Niño.
Ang 11 anyos nga bayongbayong mao usab ang madalidali og sugo sa iyang lola sa mga gimbuhaton sa balay ug kaabag usab niini sa pagpaninda og mga sud-an sa Taboan, dan Tres de Abril, siyudad sa Sugbo.
Ang kamaguwangan nga anak sa tulo ka magsuon naa na magdako kang Arsenia sanglit buwag ang ilang mga ginikanan.
Bisan sa kalisod ug pagsuway nga nasinati sa ilang pamilya, madasigon si Christian sa pag-eskwela og tarong alang sa iyang kaugmaon, timaan niini ang maayong mga grado nga iyang nakuha.
“Naningkamot na siya og eskwela bisan og squatter ra mi, naa ra mi mangatug daplin sa karsada, sa among tindahan og sud-an,” saysay ni Arsenia, 64.
Ang Grade 6 nga tinun-an sa Regino Mercado Elementary School ning dakbayan nag-eskwela isip benepisyaryo sa Pantawid Pamilyang Pilipino Program (4Ps) sa gobiyerno.
Kon duna man siya’y gusto nga pangayuon sa Señor Sto. Niño, kini mao ang kahiusahan sa ilang pamilya ug maayong panglawas ug malambuon nga negosyo sa iyang lola.
“Nag-ampo ko magkahiusa among pamilya. Magtipon mi og usa,” paambit ni Christian.
Buntag pa lang, si Christian nanuroy na og lainlaing mga klase sa kawo ug paypay alang sa mga tawo nga nisaksi sa Sinulog grand parade sa ika-454 nga kapistahan sa Señor Sto. Niño.
Ang mga kawo gibaligya nila gikan sa tag P40 ngadto sa tag P70 matag usa samtang P15 ngadto sa P20 ang matag paypay.
Bisan kon mais nga nilung-ag lang ang paniudto ni Christian, wa kini makitai og kaluya sa pagpaninda uban sa pahiyom ngadto sa mga tawo nga agnihon niya nga mopalit og kawo ug paypay.
Sumala ni Arsenia, bisan kon nag-uwan pagka Dominggo, Enero 20, mas dako ang iyang halin karong tuiga kon itandi sa nakalabay nga tuig diin kusog usab ang uwan. (B)