DUHA ka mga lalaki ang samdan sa pagpamusil sa Poblacion, Makilala, North Cotabato niadtong Huwebes sa hapon.
Nailhan ang mga biktima nga sila si Felix Mapa, 36 ug Rogelio Mangagta, 40 anyos.
Sumala sa taho sa kapulisan, mga alas 3:00 sa hapon niadtong Huwebes, nanan-aw ang mga biktima sa mga naduwa sa usa ka bilyaran sa Makilala Public Market sa North Cotabato.
Apan kalit lamang nga mibutho ang duha ka wala mailhing armado ug gipamusil ang mga biktima gamit ang kalibre .45 nga pistola.
Grabeng nasamdan ang mga biktima human nga naigo sa nagkadaiyang bahin sa lawas.
Ang mga namusil, dali nga misakay sa XRM nga motor paingon sa wala matino nga direksiyon human sa insidente.
Dali sab nga gitabang ang mga biktima sa mga nakakita ug gidala sa Kidapawan Medical Specialist Hospital.
Nasayran nga si Mangagta ang target sa mga mamumuno ug naangin lamang si Mapa.
Natahap ang kapulisan nga mga sparrow unit sa New People's Army (NPA) ang mihimo sa krimen tungod kay gitumbok nga asset sa militar si Mangagta.
Padayon pa ang gihimong imbestigasyon sa kapulisan sa maong panghitabo. (Edgardo Fuerzas)