WALAY kabutangan sa kalipay sa mga estudyante sa Pamuhatan Elementary School sa Marilog District Davao City human sila gihatdan og regalo niadtong Enero 16.
Kapin mokabat kun kulang 100 ka mga estudyante ang nahatagan og gasa nga tsinelas, school supplies, bugas, t-shirt ug ang pagpahigayon og feeding diin sila nangaon og arroz caldo.
Nagmalampuson kining tanan pinaagi sa pagtinabangay sa Department of Education 11, Criminal Investigation and Detection Group (CIDG) Davao Region, ug sa ABS-CBN Davao.
Nalipay sab ang mga ginikanan sa pagdawat sa mga gasa nga sarang makatabang kanila.
Anaa sab ang presensya ni Regional Field Unit (RFU) 11 / CIDG chief, PSupt. Edilberto DC Leonardo ug si CIDG Davao City Field Unit (CIDG-DCFU) team leader Chief Inspector Milgrace Cajes Driz.
Naglaum ang grupo nga sa sunod higayon mapadako pa nila ang maong programa pinaagi sa ilang pagtinabangay aron mahatud ang kinasingkasing nga serbisyo sa komunidad.