GILAYONG mipasar og resolusyon ang lokal nga kagamhanan sa Island Garden City of Samal (Igacos) sa Davao del Norte sa natigayong sunod-sunod nga pagpamatay sa maong isla.
Ang pagkondena nag-ugat dihang migula sa imbestigasyon sa kapulisan nga sagad personal nga bangi ug lagmit politika ang hinungdan ug motibo sa kremin.
“The City Council decided and passed a resolution condemning the series of killings in Igacos,” sulti ni Igacos Vice Mayor Orly Amit atol sa Davao Media Forum, Sabado.
Si Amit hugtanong mipasa sa resulosyon sanglit bisan og adlaw mahitabo ang pagpamatay.
Kini nag-ugat sa mga kaso nila barangay captain Paulito Reyes Villaceran sa Barangay Sion, Kaputian District diin giingon ni Amit nga walay drug-related issues ang makutay ngadto kang Villaceran.
“Medyo bug-at siya kay gawas sa asawa gipusil napod nga naay anak niyang gamay kaayo nga babaye, kinsa nagsira sa pultahan, gipusil pa gyod ang bata maygani didto naigo sa doorjam,” ingon ni Amit.
Gawas kang Villaceran, daghan pa ang misunod nga nakabsan og kinabuhi sa maong siyudad.
Dugang niya, “I trust our government agencies to come up with a finding.”
Nakita sa mga opisyal sa Igacos nga mokalas gayod og kinabuhi ang linugdangan sa personal nga dumot sa dapit ug nahimong usa sa panawagan ang paghiusa ug ang pagbutang sa hunahuna nga ang politika lumalabay lamang, apan ang kinabuhi di na kini mobalik.
Naglaum ang kadagkoan sa maong Isla nga sa di madugay makab-ot ang hustisya sa mga gipamatay ug madungog ug mabati ang gahum sa resulosyon nga alang sa mga Samalenyos.