Genoguin: BOL ba ang sulbad sa Mindanao?

KARONG adlawa mao ang plebisito sa Bangsamoro Organic Law (BOL) sa Central Mindanao kung diin gipangayo sa mga lider sa Moro Islamic Liberation Front (MILF), nga palapdan pa ang mga lungsod ug probinsiya nga nahisakop niini.

Pero sa atong nahibaw-an, dunay mga lungsod ug probinsiya nga ang mga residente niini 60 porsiyento mga Muslim, apan dili man gani uyon nga magpasakop sila sa Bangsamoro Islamic government, ngano, ug unsay mga katarungan?

Kini tungod kay wala magkahiusa ang mga Muslim sa Central Mindanao, ug kung atong mahinumdoman, ang orihinal nga grupo nga nagrebelde batok sa atong gobyerno aron pangayuon nga himuong Islamic State ang Mindanao, mao ang grupo sa Moro National Liberation Front (MNLF) nga gipangulohan ni Prof. Dr. Nur Misuari niadtonng tuig 1971.

Si Hashim Salamat sa MILF nga sakop ni Misuari nga mibuwag sa grupo niadtong tuig 1978 ang usa ka pagpamatuod nga nadugangan ang mga grupo nga nahimong problema sa atong gobyerno, sa usa ka pareho nga katuyoan nga himuong usa ka nasud Islamic ang Mindanao.

Usa lang ang katuyoan, pero dili magkasinabot, gumikan sa personal nga interes. Sa panahon ni anhing Presidente Cory Aquino, gisukip sa atong 1987 Constitution ang Autonomous Region in Muslim Mindanao (Armm), gihatagan sila sa atong tinuig nga budget aron sila ang magpadagan sa gobyerno nga otonomiya, apan unsay nahitabo? Walay kauswagan.

Si Misuari panahon ni presidente Fidel Ramos gihatagan og higayon nga maoy magdumala sa otonomiya sa Mindanao, pero walay nahitabo, milayas siya ug nahimo na usab nga kaaway sa atong gobyerno sa nahitabo nga Zamboanga siege niadtong tuig 2013.

Dinhi, mosangko kita sa dakong pangutana. Bangsamoro ba ang sulbad sa Mindanao? Kamo unsay inyong kaugalingong opinyon? Kung ako ang inyong pangutanon, kining BOL dili maoy sulbad sa problema sa Mindanao.

Una, dili magkasinabot ang Tausog ug ang Maranao; ang tribong Tausog nga si Misuari, ug ang tribong Maranao nga si Salamat, ug ang mipuli karon sa pagdumala sa MNLF.

Karon linaw usa ang Mindanao, kay girespito man ni Misuari ang suod kaayo niyang amigo nga mao si Presidente Rodrigo Duterte bisan kung ang nahatagan og dakong pasidungog ang MILF sa BOL.

Sa inyong pagtuo, natuldokan na ka ha ang kalinaw sa Mindanao kung maimplementar na ang BOL? Ambot lang, pero para nako, dili, kay naa pa’y MNLF, ug Bangsamoro Islamic Freedom Fighters (BIFF).

Kung di na presidente si PRRD, dinhi na usab magsugod ang kagubot sa Mindanao, kay duna pa’y duha ka grupo nga argabyado tungod kay di sila ang girekognisa niining gobyernoha.

Sa mubo ko nga pagtuo, padayon ang ilang pakigbisog hangtud makuha nila ang tibuok Isla sa Mindanao nga mahimong usa ka nasud Islamic.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph