COTABATO CITY -- Nakatutok karon ang Commission on Elections (Comelec) sa Autonomous Region in Muslim Mindanao (Armm) sa init nga sitwasiyon sa siyudad sa Cotabato sa ipahigayon nga plebisito sa Bangsamoro Organic Law (BOL).
Gipasalig ni Comelec-Armm director Atty. Rey Sumalipao nga andam na sila sa plebisito adlaw’ng, Lunes, Enero 21.
Anaa na sa tanang dapit sa Armm ang mga magtutudlo nga magsilbi nga board of election inspectors (BEIs) uban ang militar ug kapulisan nga maoy magpatunghay sa seguridad.
Mga pulis sab ug sundalo ang magsilbi nga BEIs sa mga dapit nga gipailawom sa hotspot area sa Comelec.
Nahatud na sab ang tanang mga election paraphernalia sa nagkalain-laing polling precinct nga gamiton sa plebisito sa Armm.
Dako ang pagtuo ni Sumalipao nga mamahimong hapsay ug malinawon ang plebisito sa Armm gawas lamang sa Cotabato City.
Yes or No lamang ang isulat sa balota, mali ang Y or N, lakip na ang (tsek) ug X.
Kinahanglan nga ayuhon sa mga botante ang pagsulat sa balota aron dili masayang ang ilang katungod sa pagboto sa dugay na nila nga gipangandoy nga kalinaw ug kalamboan sa rehiyon. (Edgar Fuerzas)