TACURONG CITY -- Patay ang usa ka kanhi barangay kagawad sa pagpamusil alas 4:20 sa hapon niadtong Sabado, Enero 19, sa probinsiya sa Sultan Kudarat.
Giila ang biktima nga si Julieto Abalos, 44, ug molupyo sa Purok 1, Barangay Mamali, Lambayong, Sultan Kudarat.
Sa taho gikan sa Sultan Kudarat Police Provincial Office nga nagtindog lamang ang biktima atbang sa iyang balay sa dihang kalit nga mibutho ang duha ka wala mailhing tawo ug gipusil kini gamit ang kalibre .45 nga pistola.
Abtik sab nga miikyas ang mga namusil sakay sa motorsiklo nga walay plaka paingon sa hilit nga dapit sa Lambayong.
Gisapupo ang biktima sa iyang pamilya ug gidala sa Tamondong Hospital sa Tacurong City apan gideklara kining dead on arrival.
Naka-angkon og samad pinusilan sa iyang ulo ug dughan si Abalos nga maoy hinungdan sa iyang kamatayon.
Daghan ang nagtuo nga posibleng ang hugtanon nga kampanya batok sa gidiling druga ni Lambayong Mayor Ramon Abalos ang hinungdan sa pagpatay sa biktima nga padayon karong gi-imbestigahan sa kapulisan. (Edgar Fuerzas)