DUHA ka mga security police escorts ni Buluan, Maguindanao Vice Mayor Ismael "Toto" Mangudadatu ang gipasakaan og kasong murder human napatay ang sinaligan ni kanhi Maguindanao governor Datu Andal Ampatuan Sr. sulod sa Gaisano South Mall sa dalang Ilustre, siyudad sa Davao sa alas 7:00 sa gabii niadtong Huwebes.

"Gawas sa duha ka mga police escorts, giapil sab sa kaso si Vice Mayor Toto Mangudadatu," si SPO2 Kelvin Joy Magno, imbestigador sa San Pedro Police Station, nagsulti sa Superbalita kagahapon sa udto dihang gitawgan sa telepono.

Mga pulis mao sila PO1 Surab Bantas ug PO1 Ibrahim Langalen kinsa maoy nakapusil patay kang Tamano Kamendan, 41, nagpuyo sa Shariff Aguak, Maguindanao.

Si Kamendan giingon nga maoy sinaligan ug pag-umangkon ni Ampatuan Sr. Gisuspetsahan sab siya nga usa sa mga suspek sa pagmasaker sa kabanay ni Mangudadatu, mga suporter ug sakop sa media didto sa Barangay Salman, Ampatuan, Maguindanao niadtong Nobyembre 23, 2009.

Ang spot report sa kapulisan nagbutyag nga si Kamendan napusilan sa nahisgutang mga pulis human niya gisulayan pagdagit ang anak ni Mangudadatu nga si Margaret, 11.

Si Mangudadatu, suma sa imbestigasyon, namalit kauban ang iyang duha ka mga anak nga sila Margaret ug Grace sa children's section sa ikaupat nga andana sa Gaisano South Mall dihang kalit silang giduol ni Kamendan.

Si Bantas miduol aron santaon si Kamindan apan giilog ang iyang armas mao nga nahitabo ang ginukdanay nga miresulta sa pagpusil kang Kamendan.

Si Kamendan nakaangkon og lima ka mga samad sa iyang kalawasan gikan sa armas sa mga police escorts ni Mangudadatu.

Nakuha sa kapulisan ang usa ka 9mm Pietro Berreta nga dunay serial number N546Z ug usa ka magazine uban sa lima ka mga buhing bala ug usa ka .45 caliber pistol nga dunay serial number 535171 ug usa ka magazin uban sa usa ka buhing bala.

Nakuha sab ang lima ka basiyo sa .45 kalibre nga pistola ug tulo ka basiyo sa 9mm nga pistola nga gipanag-iyahan sa duha ka mga pulis.

"We will be filing a murder case against the two policemen. Hinintay namin ang autopsy report at ang sworn statement ng asawa ng victim," ni Police Chief Inspector Ceazar Cabuhat, hepe sa San Pedro Police Station dihang gipangutana sa Superbalita ug mga tigbalita kagahapon sa buntag.

Si Cabuhat nagbutyag nga ilang gipaningkamotan nga makuha ang pahayag sa mga nakasaksi sa maong hitabo aron maklaro kung unsa ang tinuod nga nahitabo.

"We are now trying to get the statements of the employees of the mall because as alleged by the vice mayor the victim tried to kidnap his daughter, while the wife of the victim was saying na nagkataon lang na nagkita sila sa mall," suma ni Cabuhat.

Dihang gipakisayran sa Superbalita ang duha ka mga pulis sulod sa selda sa San Pedro Police Station bahin sa hitabo apan nagdumili sila sa paghatag og impormasyon.

Sa pagsuwat ni balita, suma ni Magno, giandam na ang mga affidavits sa asawa sa biktima aron ipasaka na ngadto sa City Prosecutor’s Office.