NIDUGANG sa kamabulukon sa Sinulog 2019 parade ang mga nag-unang bituon sa bag-ong primetime serye sa Kapuso Network nga ‘Cain at Abel’ kagahapon, Enero 20.
Kini gipangunahan nila ni Kapuso Primetime King Dingdong Dantes ug Kapuso Drama King Dennis Trillo uban sa ilang leading ladies nga sila si Solenn Heussaff ug Sanya Lopez.
Niadtong Sabado, Enero 19, ang mga bituon sa ‘Cain at Abel’, nahinabi sa mga sakop sa lokal nga media sa wala pa mohimo og duha ka mall shows.
Sa press conference, sila mapasalamaton sa mga Kapusong Sugbuanon nga nagsuporta sa serye hinungdan nga nikuha kini og maayong rating taliwala sa kalig-on sa ilang kaatbang nga serye nga ‘Ang Probinsyano’.
Sa upat ka mga bituon, si Lopez lang maoy unang higayon nga nakaapil sa Sinulog hinungdan nga excited kini kaayo.
Niadtong Sabado, ang ‘Cain at Abel’ cast nilingaw sa ilang fans sa show sa Gaisano Grand Fiesta Mall sa Tabunok, dakbayan sa Talisay ug Robinsons Galleria sa dakbayan sa Sugbo.
Niadtong Biyernes, Enero 18, ang GMA primetime series ‘Kara Mia’ nga gibituonan nila ni Barbie Forteza ug Mika dela Cruz nihimo og show sa Gaisano Grand Mall Jai Alai ug Ayala Center sa dakbayan sa Sugbo. (RRM)