NORTHERN SAMAR-- Nagdeklara na og class suspension ang pipila ka lugar sa Eastern Visayas sa adlaw’ng Lunes, Enero 21, samtang liboan ka pasahero ang stranded.
Kini gumikan sa hulga sa bagyong Amang.
Ang mga lugar nga nagdeklara og class suspension mao ang Probinsya sa Northern Samar, Southern Leyte, ug Leyte.
Walay klase sa dakbayan sa Tacloban, Calbayog, Catbalogan, Maasin, ug Ormoc, ug mga lungsod sa Culaba, Almeria, Naval, ug Kawayan sa Biliran.
Sa Northern Samar, walay klase ang preschool, elementarya, ug hayskol. Mahinumdoman nga ang Northern Samar ang nakaangkon og grabeng kadaot sa pag igo sa katapusang bagyo sa nasud sa tuig 2018 nga si Usman.
Samtang tanan level naman ang walay klase sa probinsya sa Leyte.
Samtang sa Southern Leyte, walay klase gikan pre-school hangtod hayskol.
Sa dakbayan sa Ormoc walay klase gikan preschool, elementarya, ug hayskol sa public ug private nga tunghaan.
Sa Tacloban, walay klase sa tanan level sa private ug public nga tunghaan.
Samtang sa dakbayan sa Maasin, sa Southern Leyte, walay klase sa elementarya sa public ug private nga tunghaan.
Matod sa mga lokal nga kagamhanan, tuyo nila nga malikay sa disgrasya ang mga studyante sa posibleng kusog nga bundak sa uwan nga magdala og pagbaha ug landslide.
Nagbutang na og mga command centers ang mga local government units samtang naka andam na tanang kahimanan sa rescue operation.
Walay biyahe
Gumikan sa bagyo, gipugngan na usab sa Philippine Coast Guard (PCG) ang mga biyahe sa barko sa mga lugar nga dunay storm signal.
Base sa report sa PCG Eastern Visayas, 1103 ka pasahero ug 146 ka rolling cargoes ang stranded lukop Eastern Visayas.
Mas daghang stranded sa Southern Leyte diin sagad sa mga stranded padung sa Mindanao.
Samtang daghan usab nga stranded sa Allen sa Northern Samar diin sagad sa mga stranded padung sa Luzon.
Sa dakbayan sa Ormoc natala ang 215 ka pasahero nga stranded nga buot mo paingon sa dakbayan sa Sugbo.
Base sa latest bulleting sa Philippine Atmospheric, Geophysical and Astronomical Services Administration Signal Number 1 gihapob ang Eastern Samar, Samar, Biliran, Leyte, Southern Leyte, Eastern Bohol, ug Northern Cebu.
Ang bagyong Amang ang unang bagyo nga nisulod sa Pilipinas ning tuig 2019.