NAGPAHIMANGNO ang City administrator sa lokal nga panggamhanan sa dakbayan sa Cagayan de Oro nga sundon sa mga empleyado sa gobyerno ang nakalatid sa balaod ilabi na karong nagkaduol ang eleksiyon.
Nasayran nga ubay-ubay ang mga ginadili sa balaod sa Commission on election ilabi na alang sa mga empleyado sa gobyerno sama na lamang sa dili pagpangompanya og kandidato ug pag-apil sa mga rally, pagsul-ob og mga t-shirt, pins, kalo ug ubang mga kagamitan nga nagsuporta sa usa ka kandidato o partido ug bisan pagsilbi isip watcher sa adlaw mismo sa eleksiyon.
Ang mga empeleyado sa gobyerno wala kini gidid-an sa pakiglambigit sa social media sama sa pag-like, pag-comment, pag-share, pag-repost, ug pag-follow sa kandidato o partido apan kinahanglan nga dili kini mangompanya sa ilang kandidato.
Gitugotan usab sila nga magpadayag sa ilang mga panglantaw diha sa problema o isyu sa pulitika.
Nagpahimangno si Teodoro “Teddy” Sabuga-a nga angayang sundon lamang sa mga empleyado ang nakalatid sa balaod, ilabi na sa mga ginadili panahon sa eleksyon.
“Sundon gyud unsa ang mga balaod ug regulasiyon kay naa may mga gilatid dinha. In fact, gani ako from time to time ginalantaw gyud na nako ang gitawag nato nga road map, mga policy diha panahon sa election,” matud ni Sabugaa.
Gidugang pa niini nga wala’y mga kausaban karong panahona sa mga empleyado sa city hall sa Cagayan de Oro. (KCS)