TIKLO ang ikaduha sa listahan sa kapulisan ug sa Philippine Drug Enforcement Agency atol sa drug buy-bust operation niadtong Huwebes, Enero 17, sa Zone 6 Capisnon, Barangay Kauswagan, dakbayan sa Cagayan de Oro.
Ang suspetsado naila nga si Jerome Reyes, 39, residente sa nahisgutang dapit kinsa ikaduha sa listahan sa City level.
Sa nahipos nga impormasiyon giingong nagpahigayon ang tinugyanan sa Cagayan de Oro City Police Office, City Drug Enforcement Unit, ug Crime Against Person and Property Desk og operasiyon hinungdan nga malampusong nasikop si Reyes ug napalitan kini og shabu nga mubalor sa P500.
Nakuha usab gikan sa posisyon sa suspek ang anaa sa lima ka gramo diin gibana-banang anaa sa P35,000.
Ang suspetsado kasamtangang anaa na sa kustodiya sa nahisgutang buhatan aron sa pag-atubang sa kasong ipasaka batok niini. (KCS)