GIDILI sa Cagayan de Oro City Police Office (Cocpo) ang “permit to campaign” nga gipangayo sa New People’s Army (NPA) sa mga kandidato nga magpapili karong Mayo 13 nga eleksiyon.
Gibutyag ni Police Superintendent Robert Delos Reyes, hepe sa Operations and Plans Branch sa Cocpo, nga wala pa sila’y namonitor karong mga panahona apan padayon ang pagbantay sa susama niini nga mga kalihokan.
“Wala pa naman tayong namomoitor na naghihingi nga permit to campaign pero mino-monitor pa rin natin sila,” matud ni Delos Reyes.
Gidugang niini nga gidiskorahe nila ang mga pulitiko sa mga susama niini ug kung duna’y mangayo niini nga mga permit isumbong dayon sa kapulisan ug mga kasundalohan aron kini nga maaksiyonan.
Padayon usab ang hugot nga seguridad nga gipatuman sa kapulisan ug kasundalohan sa bukirang bahin ilabi na sa nagkaduol nga eleksiyon.
Kahinumdoman nga una na nga nagbutyag ang kapulisan nga duna pa gihapon kini sila’y namonitor nga kalihokan sa NPA ilabi na sa pagpang-recruit sa mga kabatan-onan. (KCS)