MIPASALIG ang kapulisan nga walay dapigan nga kandidato o pulitiko human nahimong kontrobersiyal ang Unity Walk ug Peace Covenant signing sa dakbayan sa Cagayan de Oro.
Wala mitunga ang kampo sa PaDayon Pilipino gawas lamang ni Congressman Rofus Rodriguez atol sa maong kalihokan tungod anaa sa programa si Mayor Oscar Moreno diin mao ang naghatag og welcome address.
Matud ni Police Superintendent Mardy Hortillosa, tigpamaba sa Cagayan de Oro City Police Office, gipasalig niini nga dili sila ma-impluwensiyahan.
“Wala man ta’y gidapigan kay kita nakabalo naman ta sa atong limitasyon, kay ang ato trabaho ra man gyud ang atong ginatan-aw diha kung unsa ang mandato sa atoa kay actually ang among boss man gyud dili man ang pulitiko ang katawhan man sa dakbayan sa Cagayan de Oro,” matud ni Hortillosa.
Gidugang pa niini nga igo lamang sila nga nagtuman sa kamandoan usab sa Camp Crame ug naka-format na ang maong programa gumikan mao man kini ang direktiba.
“Among mapasalig nga dili kami ma impluwensiyahan sa unsa man nga ilegal nga plano,” miingon si Hortillosa.
Kahinumdoman nga namahimong kontrobersiyal ang maong unity walk sa dakbayan gumikan sa gibutyag sa usa sa mga nagpapili sa pagkamayor, nga si Jose Gabriel “Pompee” La Viña, diin giingong dili patas ang maong kalihokan sa dakbayan. (KCS)