GI-APROBAHAN sa konseho ang gidusong ordinansa kalabot sa pagpatattoo ug body piercing aron masiguro nga luwas ang katawhan sa risgo nga makuha niini.
Kini ang City Ordinance 2019-05 o “2018 body piercing and tattooing regulation ordinance” nga naghatag og mga regulasyon diha sa luwas nga pagpatattoo ug body piercing, lakip na ang operasiyon sa mga tattoo studios o parlors sa dakbayan sa Cagayan de Oro.
Ang maong proposed ordinance ni Ma.Lourdes Gaane kinsa ulo sa komitiba sa panglawas gi-aprobahan sa konseho atol sa session niadtong Lunes, Enero 14.
Nakalatid sa ordinansa sa dakbayan nga tumong niini ang masiguro ang kaluwasan sa katawhan batok sa risgo sa panglawas ug sa tanang posible nga komplikasiyon nga makuha pinaagi sa tattoo.
Giingon nga ang magtattoo o tattooer kinahanglan magsul-ob og limpyo nga mga kagamitan ug bisan sa mismong panglawas.
Angayang duna’y kahibalo ug saktong edukasiyon kalabot niini ang usa ka tattooer ug kinahanglan nga duna kini kasinatian ug uban pa.
Kinahanglan usab matag tattoo parlor dunay mga lisensiya lakip na permit nga gikan sa City Health Office (CHO).
Ginadili usab ang pagtattoo sa mga kustomer nga nag-edad og 15-anyos paubos, mabdos, ug nalambigit sa ilegal nga druga.
Giingong ang makalapas niining maong ordinansa, ilabi na kung walay lisensiya o License to operate gikan sa CHO diha sa pagpang tattoo, posibleng mabilanggo sulod sa dili molapas sa 30 ka mga adlaw ug multa nga P1,000 ngadto na sa P5,000.