MOABOT og P2.5 milyones ang bana-bana sa kapulisan ug alang kanako wa kini malayo sa kamatuoran kay mao kadto ang labing baga ug dako nga bul-og sa katawhan nga nanggawas sa kadalanan sa Syudad sa Sugbo.
Nakahisgot ko niini karon tungod sa usa ka Facebook post nga nikuwestyon sa maong bana. “Bloated” kun gipaburot lang, matod pa, aron monindot pa daw ang taho sa kapulisan.
Matod pa, basi daw sa populasyon sa Syudad sa Sugbo, ug kon duna pa silay tagurha nga mga bisita, lisud gyud katuohan ang 2.5 milyones.
Apan alang kanako, wa giapil og kwenta ang minilyon nga nidagsang sa Syudad sa Sugbo gikan sa lain-laing lungsod sa Sugbo, sa ubang mga probinsya, ug labi na ang gikan sa Metro Manila.
Mas nidaghan pa gyud sab ang kadaghanon sa mga turista.
Nakaingon ko niini kay nisuway gyud ko sa paglakaw gikan sa among opisina sa Sanciangko padulong sa balay sa mga Mongaya diha sa Upper B. Rodriguez kagahapon sa hapon.
Nibiya ko mga alas 4 sa hapon ug mga alas 5:30 na ko naabot.
Diri ko agi sa Junquera Ext., RR. Landon, ug F. Ramos, unya nilabang diha dapit sa Belvic (ambot unsa nay ngalan anang building karon) kay nilusot ko sa sulod padulong sa luyo. Nilusot dayon ko sa Fuente Osmeña padung sa among karaang balay agi kilid sa Larsian.
Nibalik ko nga naglakaw padulong sa Sanciangko mga alas 8 sa gabii.
Mag-agi-an ko niining maong ruta kay sulod sa pipila ka dekada, mo-duty man ko sa Sun.Star hangtod sa akong early retirement sa 2010. Pipila ka tuig human niini, nabatasan na sab nako nga magsuotsuot sa Sinulog crowd sa Fuente ug Jones.
Ug ako gyud nga nakita nga ang katawhan kagahapon maoy labing baga.
Hinuon. nakaingon ko nga nasubrahan ang ka-istrikto sa atong kapulisan. Lalim bay dunay mga Sinulog volunteers nga dunay all-access pass di na palutson. Maayo na lang kay resourceful ang maong mga volunteers.
Unya, kining total shutdown sa cell signal dapat unta last resort sa security measures ug dili maoy unahon. Kay kon tinuod pa nga dunay bomb threat ug ang triggering device ginamit ang cell phone, baga man kaayo ang Sinulog crowd pagbalik sa signal mga alas 7 sa gabii.
Mas angay pa gamiton sa atong kapulisan ang ilang Intelligence.
Bisan pa man, makaingon ko nga malampuson ang pagpahigayon sa seguridad ug sa peace and order. Ug tungod niini, atong i-congratulate ang atong kapulisan nga gipanguluhan ni Cebu City Police Chief Royina Garma ug PRO 7 Regional Director Debold Sinas.
Pit Senyor!
(@anol_cebu sa Twitter)