SECTIONS
Saturday, February 16, 2019
SUPERBALITA CEBU

Nagpakabana: Undangon og padagan

PISTA Senyor. Sa akong pagsulat ning akong lindog niadtong gabii sa Dominggo, wa koy nadunggan nga taho nga dunay mga panghitabo nga di maayo atol sa Sinulog parade. Gani, bisan pa sa ulan nga dala ni Bagyo Amang nagpadayon gihapon ang parada sa mga kontestant sa sayaw-Sinulog, mga float ug higante.

Magpasalamat ta sa Kahitas-aan nga walay dautang mga panghitabo sa kapistahan ni Senyor Santo Niño ug sa katawhan nga wa kaayo magpabadlong. Apan ang uwan dako usab ang natabang kay nakahipos ug nakapugong sa baga nga katawhan sa paglakaw-labang sa kadalanan nga makabalda sa pag-agi sa mga nagsinulog nga kontestant.

Apan daghan ang naluoy sa mga bata nga apil sa sayaw-sinulog nga nakaligo sa uwan. Matud pa, dunay naligId nga bata samtang nagsayaw sa entablado didto sa Abellana Sports Center tungod kay basa na sa uwan ang sawog. Hinuon, walay gitaho nga dunay nabun-og.

Daghan kaayo ang midagsang nga turista, lokal ug langyaw, bisan kon miubos ang gidaghanon sa partisipante sa Sinulog. Sa akong mga higala ug paryente nga nia ron sa Cebu aron mamista ug mosaksi sa Sinulog manghinaut ko nga ni-enjoy mo. Pit Senyor!

•••

UTAW-UTAW. Niadtong Huwebes nisakay ko sa MV Starcraft, nga iya sa Dragon Star Highway Shipping Corp., gikan sa Tubigon padung sa Cebu city. Migikan sa Tubigon pasado alas dos sa hapon ug modagan og kapin usa ka oras lang. Sa ato pa, moabot sa Sugbo mga alas 3:30 sa hapon.

Apan miabot mi sa Pier 3, Cebu City hapit na alas 5 sa hapon kay nagutaw-utaw mi sa dagat atbang sa SRP dihang namatay ang makina sa Starcraft. Naatol ang pagkamatay sa makina samtang napilaw ko. Nakugang ug nahigmata ko dihang miingon ang usa sa mga pasahero “oy mibalik man ta sa Bohol”.

Sa akong pagmata mora ko og naalimungawan. Sa akong paglili sa bintana akong nakita nga nagkalayo na mi sa SRP kay gianod mi og balik sa among giagian tungod sa makusog nga sug sa Mactan channel. Unya, nakadungog na lang ko sa usa sa mga tripolante nga nag-ingon nga dunay moreskyo na to.

Duolan og usa ka oras una miabot ang lain nga Starcraft diin gigaid ang among gisakyan sa kilid ug naghinay-hinay og dagan padung sa Pier 3. Dunay usa ka pasahero guol na kaayo naghunahuna nga di siya ug ang iyang asawa makaapas sa alas 6 sa hapon nga biyahe sa eroplano padung sa Ilo-Ilo.

Misuway ko og tawag sa Marina human gitext ni Eric Manait ang ilang numero sa telepono apan walay mitubag. Ako unta ipangutana sa regional director nganong gitugtan pa og padagan ang Starcraft nga sa akong tan-aw di na man seaworthy. Gani, matod pa, dunay nangagi nga insidente diin namatay ang makina sa Starcraft samtang naglawig.

Angayan nga tan-awon og usab sa Marina ang kahimtang aning mga Starcraft.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!