GAWAS sa mga ginagmayng kasamok nga dali ra usab nga nahusay, sa kinatibuk-an, malampuson ug malinawon ang pagpahigayon sa usa ka semanang kalihukan sa pagselebrar sa 2019 Sinulog festival.
Kini taliwala sa nagkadaghan nga mitambong sa maong tinuig nga relihiyusong kalihukan kon itandi sa mga nangaging selebrasyon.
Gibanabana nga moabot ngadto sa 2.5 million ang linawas nga misaksi sa grand parade nga mas daghan pa kon itandi sa miaging tuig nga gituohang mikabat ngadto sa dos milyones.
Atong gihangop ang kadasig ug kahago sa mga kapulisan, mga sakop sa militar ug sa tanang mga boluntaryo nga nagrepresentar sa nagkalainlaing sektor sa katilingban.
Wa makatarog ang hudlat sa panahon, ang pag-ulan ug ang mga hulga sa dautang elemento sa gidaghanon sa mga tawo nga mihan-ok sa kinapusurang bahin sa dakbayan sa Sugbo.
Nakatampo usab ang pag-ban sa mga establisemento sa pagpahigayon og mga street party ug aduna na usay gipasunod nga paglimit sa pagbaligya og ilimnon nga makahubog.
Malampuson man tuod, apan daghang mga leksiyon nga angay gihapong kat-unon ang atong mga nagpasiugda, ilabi na sa mga pagpahimutang sa usa ka semanang kalingawan matag gabii.
Pananglitan ang pagpahigayon og libreng konsiyerto sa sikat nga mga banda sa Manila diha sa Fuente Osmeña Circle niadtong adlawng Biyernes, Enero 18, nga wala na makontrolar sa mga nagbantay ug sa mga organizers sa maong presentation.
Gawas nga naghatag og grabing kahasol sa mga motorista, makita sa mga video footage nga nikatap sa social media ang karisgo sa mga batan-on, ilabi na sa mga babaye, nga nangatkat sa mga railings nga may hait ang ibabaw nga bahin niini nga naghatag sa makuyaw nilang sitwasyon.
Hinaot nga dili na kini mausab sa sunod nga higayon.