TALIWALA sa kakulian sa timbang nga nasinati ni Jhack Tepora sa nakatakda unta niining away sa undercard sa Manny Pacquiao-Adrien Broner bout niadtong Dominggo (RP time) sa Las Vegas, gibutyag sa iyang handlers nga dili mosaka og timbang ang gitawag og El Capitan.
Si Tepora, kinsa adunay impresibong 22-0, 17KOs nga rekord, natangtangan sa iyang World Boxing Association (WBA) Interim featherweight title human kini wala nakakuha sa 126-pound weight limit sa iya untang depensa batok kang Mexican Hugo Ruiz (38-4, 33KOs).
Milapas og 5.5 pounds sa weigh limit ang 23 anyos nga si Tepora hinungdan nga gikanselar ang away nila ni Ruiz.
Gipasabot ni Jingjing Tepora, igsuon ug head trainer ni Jhack, nga ubay-ubay nga mga rason ang ilang nakita nga hinungdan sa kapakyasan sa iyang igsuon sa official-weigh in.
Usa na niini mao ang ulahi na nilang kasayuran nga moaway si Jhack sa undercard sa Pacquiao-Broner bout.
Matod ni JingJing nga ilaha lang kining nahibaw-an atol sa adlawng natawhan ni Pacquiao niadtong Disyembre 17.
“Kaya ra man niya ang 126 pero nadaot lang gyud sa short notice. Nakahibalo lang mi nga moaway siya sa Pacquiao fight katong pag-birthday ni Manny. Mga one month and two days ra gyud ang among klaro nga training,” asoy ni JingJing.
Hinuon gipasabot ni JingJing nga sa wala pa nila nasayran ang kabahin sa away ni Jhack sa Pacquiao-Broner undercard, gipaubos na niya si Jhack sa gaan lang nga ehersisyo sa pagtuo nga karon pang Pebrero 9 ang sunod away niini.
“Katong amo nang nahibaw-an nga moaway diay si Jhack sa undercard ni Manny, amo gyud nga gitrabaho ug nakakompleto pa siya’g sparring rounds pero lisod na gyud kuhaon ang iyang timbang kay luya na siya,” matod ni JingJing.
Sa iyang Facebook account, si Jhack ni-post og komentaryo diin nagpasalamat siya kang Pacquiao sa oportunidad nga gihatag sa Pambansang Kamao.
Sa samang higayon, nangayo og pasaylo si Jhack sa 8-division world champion ug misaad nga mobawi kini sa iyang sunod nga tahas.
“Congrats sir Manny Pacquiao. Thank you sa tanan ug pasayloa kaayo ko. Bawion ni nako sa sunod,” post ni Tepora, kinsa ubos sa pagdumala sa MP Promotions nga gipanag-iya ni Pacquiao.
Nagkanayon si JingJing nga misaad ang MP Promotions nga hatagan si Jhack og dakong away karong Abril.
“Sa pagkakaron, pahuway lang una si Jhack. Misaad man ang MP Promotions nga paawayon siya karong Abril, amo ning pangandaman og maayo,” dugang ni JingJing.
Sa laing bahin, gibutyag ni JingJing nga makaluluoy ang nasinati ni Jhack sa Las Vegas human sa Pacquiao-Broner fight gumikan kay gawas nga wala kini nakuha bisan gamay sa premyo unta niini, napasagdan na lang kini sa mga nagpasiugda sa promosyon.
“Gipasagdan na lang sila didto. Maayo na lang kay gitabangan siya ni coach Nonoy,” matod ni JingJing, kinsa nagtumbok kang Nonoy Neri, usa sa trainers ni Pacquiao. Karong adlawa, nakatakdang mouli si Jhack dinhi sa Sugbo. (ESL)