ADUNA na man tuod kasauban sa ilang tagsatagsa ka puwersa apan mao ra gihapon ang resulta sa panagsangka og balik sa Alab Pilipinas ug Thailand Mono Vampires human sa ilang engkuwentro sa finals sa miaging season sa Asean Basketball League (ABL).
Sa pagpangulo ni import Renaldo Balkman ug sa bag-ong mga sakop nga sila si import PJ Ramos ug Ethan Alvano, ang Alab Pilipinas ningmakmak sa Mono Vampires, 110-100, niadtong Dominggo sa gabii sa Sta. Rosa Multi-Purpose Complex sa Laguna.
Sa finals series sa miaging season, miagi og grabeng pagpanghudlat ang Alab Pilipinas una niini nadispatsar ang Mono Vampires. Niadtong higayuna, ang Alab gipangulohan pa nila ni Balkman ug Ray Parks Jr.
Sa paghiabot nila ni Ramos ug Alvano sa kampo sa Alab Pilipinas, dili ikalimod nga misakmot kalig-on ang puwersa niini apan nakasinati hinuon gihapon kini’g mga pagpanghudlat batok sa Mono Vampires.
Sa kadaugan, napahugtan sa Alab ang ilang paggunit sa liderato dala ang 8-2.
Sunod ikasangka sa Alab Pilipinas ang Westports Malaysia Dragons sa Sta. Rosa Multi Purpose Sports Complex karong Enero 27 ug sa Enero 29 ikontra nila ang Hong Kong Eastern.
Sulngon nila ang China Wolf Warriors sa Doumen Gymnasium, Zhuhai sa Enero 29 sa dili pa kini moduwa og balik sa Hoopsdome sa Lapulapu City sa Pebrero 3 batok sa Saigon Heat. (ESL, JBM)