Roldan: Kinabuhi magsugod sa 50?

DILI na tinuod ang karaang panultihon nga "life begins at 40." Magsugod daw ang pagkukadidang sa lalaki ug babaye sa paghiabot nila'g 40 anyos.

Kung dili magkasinabot, mosangpot kini nga magkabulag kay sayo sa buntag na mouli si mister bisan walay overtime. Tungod kay dagko na ang mga anak, si misis magsige sab og paguwapa bisan walay okasyon ug magyampungad sa iyang mga kumare.

Kini pod daw nga panahona nga maadunahan, malantip ang hunahuna, moguwa ang tinaguang kahanas sa tawo busa hilig niini ang mag-outing, magbiyahe ug ang paugnat sa kusog.

Apan human sa pipila ka tuig, hinayhinay kini nga mawala ug ang mahibilin lamang kadtong mga ginabuhat nga simple ug mahinungdanon kaayo kanila.

Mograbe na ang bationg sakit sa likod, ngulngol sa tiil nga puwede nang miyembro sa Rayuma-Artraytis Movement (Ram). Mas nindot nang matulog kaysa mosuroy ug dali nang saputon bisan gamay lang nga kasikas sa iro sa silingan.

Kung dili ihatag ang gusto, mangdabog ug mangluod dayon sama sa gamay'ng bata nga wa hatagi sa iyang kendi.

Motalikod lang si mister kung manguhit ug mamukaw na si misis aron matulog kay mas gahi pa ang ubo. Kung ganahan si mister, di pod ganahan sa misis mao nga mosangpot sa away ug pagpanglupad og butang sa bintana.

Apan sa akong pangagpas nausab na kini sa 50 anyos. Niadtong Dominggo gipakita sa atong 40 anyos nga si Senador Manny "Pacman" Pacquiao nga gahi pa ang iyang mga kinumo ug tuhod sa pagkulata niini sa Amerikanong boksidor ang si Adrien Broner didto sa Las Vegas.

Layo kaayo ang lat-ang sa ilang edad tungod kay 29 lang ang Amerikano ug mas dako ang iyang lawas kaysa sa atong Pambansang Kamao. Kuyaw og kusog pa kining mosiyapol nga daw manok dirasa nga ginabulhotan og tabakong Alhambra gikan sa Cuba.

Gipakita ni Pacman nga may ikabuga pa siya bisan kung mga milenyals pa ang ikontra batok kaniya.

Kung lantawon pa nato, mas paspas ug agresibo kaayo si Pacman sa iyang away karon kung ikumpara sa ubang away niya kaniadto ilabi na kadtong napildi siya.

Busa posible gayud nga anaa pay 2 o 3 ka away niya sa boksing hangtud nga moretiro kini una moabot ang ika-50 niya nga adlaw'ng natawhan.

Kaniadto man god, ubos kaayo ang "life expectancy" sa Pilipino nga moabot la'g 55 anyos apan karon miabot na kini'g sobra 60 ug mas taas pa sa babaye.

Mas motaas pa gayud kini sa bag-ong medisina, food supplement, bitamina ug ang pagka-"health conscious" sa tawo mao nga dugay nang mamatay.

Speaking sa kamatayon ug alang sa iyang mga higala, namatay diay ang among ig-agaw nga kanhi Mr. Mindanao nga si Cesar "Boy" Roldan sa pangedaron nga 77 anyos.

Gawas sa iyang pagkamahiligon sa "body-building", ilado ug eksperto sab kini nga sastre nga may dakong tailoring kaniadto sa dalang Rizal.

Gilubong siya didto sa Davao Memorial Park niadtong Biyernes. Nakig-unong kami sa iyang asawa nga si Baby Villanueva ug mga anak nga sila si Shirley ug Cesar Jr.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph