MEDYO mihayag na ang tinguhang pagpaubos sa edad sa criminal liability sa bata gikan sa 15 anyos ngadto sa 9 anyos.
Kini maoy naaprobahan sa pagdungog sa House justice committee sa Kongreso kagahapon.
Ang balaudnon o ang House Bill No. 505 nga gipangamahan ni Tarlac 2nd District Rep. Victor Yap aprobado na sa lebel sa justice committee nga magtakda og "minimum age" sa criminal responsibility.
Namatikdan man god nga ang 15 anyos nga bata nagbaton na og saktong buot hinungdan nga gipahimuslan sa sindikato ug gigamit sa ilang modus operandi.
Apan ubos sa gisugyot nga balaudnon, mga bata nga malambigit sa pagpatay, karnaping, ilegal nga druga ug uban pa, di prisohon ug iuban sa regular nga mga bilanggo apan ibutang sila sa "reformative" nga institusyon kon diin tutukan ang ilang rehabilitasyon ug pagreporma kanila.
Paningkamutan nga tabangan silang mabag-o ang ilang gawi ug dad-on sila og balik ngadto sa komunidad.
Apan kon duna may mipabor niini, duna say dili. Kay karon pa lang daan, mialma na ang Commission on Human Rights (CHR) sa maong balaudnon.
Unta kon makalusot man kini ug hingpit nang mahimong balaod, seguradohon sa gobyerno nga way maabuson nga katungod sa mga bata nga malambigit unya sa kriminalidad.