COTABATO CITY -- Padayon karon ang gihimong imbestigasyon sa mga awtoridad bahin sa pagpabusikad og bomba sa balay sa usa ka huwes sa dakbayan alas 9:05 sa gabii niadtong Dominggo.
Sumala kang Cotabato City Police Office director, Senior Superintendent Michael Lebanan nga upat ka wala mailhing lalaki nga sakay sa duha ka motorsiklo ang miitsa'g duha ka granada sa balay ni Judge Angelito Rasalan sa Mother Barangay Rosary Heights sa dakbayan.
Apan suwerte na lang nga way naangol sa pagbusikad apan nakamugna kini og sobrang kahadlok ngadto sa pamilyang Rasalan, lakip na sab mga molupyo duol sa dapit.
Daghan ang nagtuo nga dunay kalabutan sa trabaho ni Rasalan ang motibo sa pagpabusikad sa granada.
Nasayran nga ang pamilya ni Rasalan suod nga higala sa mga politiko nga nagsuporta ug pabor sa Bangsamoro Organic Law (BOL) nga gilantaw sab nga hinungdan sa hitabo. (Edgar E. Fuerzas)