MILIMOD ang usa ka senior citizen sa alegasyong iyang gisungkab ang asawa sa iyang silingan didto sa Bread Village, Brgy. Buhangin Proper, alas 12 sa udto, niadtong Dominggo.
Sa Buhangin Police Station gilimod ni Lolo Tacio, 72-anyos sa pasangil ni Eduardo, 69-anyos nga iyang gisungkab ang asawa niini nga si Marina, 71-anyos.
Giingon nga lango sa ilimnong makahubog si Eduardo nga miadto sa balay ni Lolo Tacio ug nangumpronta kini sa istorya nga iyang nadungog.
Una niini, labihang kapungot ni Eduardo dihang iyang nasayran nga dunay sekreto nga relasyon si Lolo Tacio ug si Marina, ug alegasyong dunay natigayong pag-uban sa duruha sa usa ka kuwarto.
Atol sa kasamok sa pagkompronta ni Eduardo kang Tacio, daling nanawag og pulis ang mga silingan ug gipangdala sila pinaagi sa mobile patrol 27.
Atubangan sa desk officer sa Buhangin PNP, gilimod ni Lolo Tacio nga duna silay relasyon, inay usa ka higayon lamang nga nakita silang duha sa mga silingan nga nagtapad og lingkod sa tindahan ug nakinataw-anay.
Samtang si Marina, perte sab nga limod sa pasangil sa bana.
Gimandoan si Eduardo sa kapulisan nga sa barangay nalang siya moreklamo aron didto sila mahusay.