ARON dili na maproblema ang kahuot sa lainlaing mga prisohan, gisugyot ni Provincial Health Officer Dr. Rene Catan nga ibutang sa usa ka isla ang mga bilanggo sa lalawigan sa Sugbo.
Atol sa unang quarter nga tigom sa Provincial Peace and Order Council (PPOC) pagka Lunes sa hapon, Enero 21 sa Kapitolyo, sumala sa pangu sa PHO, nga magpili og usa ka isla ang probinsya ug ibutang ang mga piniriso didto ug hatagan kini sa ilang nag-unang panginahanglanon sama sa pagkaon, tubig ug kapuy-an ug pabantayan og mga gwardya.
Matod niya, sa ingon niini malikayan ang pagkatap sa mga sakit sa mga bilanggo ug makontrolar usab kini.
Sigon ni Catan, di na masulbad ang suliran sa kahuot sa mga prisohan gumikan sa nagkadaghan nga populasyon sa Sugbo.
“Why not see the model of looking at that possibility for future consideration rather than sige ta og build and build unya puno gihapon. Gamiton ta nang isla daghan kaayo, mangita lang,” pasabot sa doktor.
Matod ni Catan, adunay 137 ka mga isla sa probinsya sa Sugbo ug katunga niini base sa gisulti kaniya ni Provincial Tourism Officer Joselito Costas, ang wala pa mapuy-i og mga tawo, nga mahimong magamit isip prisohan sa mga bilanggo.
“We literally sit down and think about it. It’s something nga additional solution. But we don’t take it seriously because nobody has done it. What I’m saying is, let’s for awhile think something that’s not usual,” dugang ni Catan.
Si Jail Supt. Rosalina Malahay, provincial director sa Bureau of Jail Management and Penology (BJMP) Cebu, nipasabot nga kadaghanan sa mga bilanggo sa Sugbo kay nagpaabot pa og pinal nga hukom sa ilang mga kaso.
“So, luoy sad kaayo ba. In Cebu there are only less than 200 ang convicted...,” dugang sa opisyal sa BJMP Cebu.
Si Catan nidugang ang mga binilanggo nga dili mga high profile, mahimong makalakawlakaw sa isla ug tudloan og panginabuhian aron mahimo sila ma-integrate sa katilingban.
Iyang gihimo nga sanglitanan ang Iwahig Prison and Penal Farm sa Puerto Princesa City sa Palawan. (SCG)