USBAWAN ni Cebu City Mayor Tomas Osmeña ang hinabang gikan sa Sinulog Foundation Incorporated (SFI) nga madawat sa mga out of town contingents kinsa mosalmot sa Sinulog Festival 2020.
Ang Sinulog 2019 gihulagway ni Osmeña nga maoy labing malampuson.
Iyang gihulagway nga natagbaw ang mga Sugbuanon sa gipakitang performance sa mga partisipante.
“This year we have given sa tanang out of town contingents P400,000 as a subsidy, next year we are going to make a P1 million subsidy for contingents. Kay nakita gyud sa mga Cebuano nga it’s worth it,” padayag ni Osmeña atol sa iyang pagpamulong kagahapon atubangan sa libuan ka mga tawo sa grandstand sa Cebu City Sports Center.
Si Osmeña kinsa maoy overall chairman sa SFI niingon nga nahibawo ang Cebu City Government kinsa maoy labing dako nga nagpaluyo sa kalihukan nga mogasto og kapin o kulang P6 milyones ang matag contingents nga mosalmot hinungdan nga iyang gipasalamatan ang ilang mga lumolupyo.
Atol sa pagpakighinabi sa mga tigbalita, pipila ka minutos sa wala pa siya nibiya sa sports center, gipangutana ang mayor kon aduna bay igong kapasidad ang City Government paghatag sa P1 milyon nga gipaagi sa SFI gikan sa 24 ngadto sa 30 ka mga contingents nga posibleng moapil sunod tuig.
Buot ipasabot, gilakip sa pag-ihap ang tanang contingent nga nisalmot, lakip na ang entrante gikan sa Sinulog sa dakbayan, lalawigan.
Niingon si Osmeña makaya ra sa panudlanan sa siyudad sa Sugbo.
SINULOG SA 2021 ADTO NA MARSO
Gipahibawo ni Osmeña nga sa ika-500 ka tuig nga pag-abot ni Snr. Sto. Niño dinhi sa Sugbo, ang Sinulog, inay ipahigayon sa ikatulong Dominggo sa Enero, ibalhin na ngadto sa Marso 15, 2021.
Kini aron motugma sa ika-lima ka siglo nga pag-abot sa Balaang Bata nga gidala kanhi ni Ferdinand Magellan, kinsa napatay ra usab ni Lapu-Lapu.
Gipaabot nga motambong sa Sinulog mao ang King of Spain ug ang Santo Papa.