DUNA nay kadangpan ang mga senior citizen nga dunay cataract ug ubang mga problema sa mata sa amihanang Sugbo gumikan sa bag-ong pacilidad alang sa mata nga gibuksan sa Cebu Provincial Hospital sa siyudad sa Danao.
Sumala ni Dr. Rene Catan, pangu sa Provincial Health Office (PHO), libre ang operasyon sa CPH-Danao sa cataract bisan kon residente pa sa dakbayan sa Sugbo ang magpaopera, basta lang miyembro kini sa Philippine Health Insurance Corp. (Philhealth).
Matod niya, kon sa pribadong ospital himuon ang operasyon sa cataract, siya nibanabana nga moabot kini gikan sa P50 mil ngadto sa P100 mil.
Ang cataract care unit ug ophthalmology operating room sa CPH-Danao gibuksan niadtong Enero 9. Kini na ang ikatulong pacilidad sa mata nga giablihan sa kagamhanan sa lalawigan sa Sugbo. Ang naunang duha ka mga pacilidad mao sa CPH-Balamban ug CPH-Carcar.
Si Catan nipahibawo nga karong sunod buwan, ablihan na usab ang ikaupat nga eye facility sa CPH-Bogo.
Sigon niini nihatag og suporta ang Department of Health sa maong programa pinaagi usab sa Prevention Blindness Program niini samtang ang Mabuhay Foundation maoy nanghatag og libre nga lenses sa mata sa mga naoperahan na.
Siya nidugang nga tinguha gihatagan nila og prayoridad ang pag-abli og pacilidad alang sa cataract sanglit daghan ang mga kaso ug seryuso ang problema niini sa lalawigan sa Sugbo.
“Unya ganahan ta by 2025, 2030, moubos ang atong mga kaso sa cataract dinhi sa provice. Ma-prevent pud nato, kay kini pag-prevent sad sa blindness. Kay kon matangtangan nimo sila og cataract, ma-mprove man gyud ilang vision,” pamulong ni Catan dihang nahinabi sa Superbalita Cebu pagka Lunes, Enero 21.
Siya nidugang ang usa ka set sa mga ekipo ug instrumento sa pag-opera sa cataract, moabot og P4 milyones. Apil niini ang operating microscope, head lamp, slit lamp, keratometer ug biometrics machine. (SCG)