PUNO sa pasalamat ang lokal nga kagamhanan sa lungsod sa Consolacion human naangkon sa ilang contingent nga Tribu Malipayon ang kampeyonato sa free interpretation category sa Sinulog ritual showdown 2019.
Una kining higayon nga nisalmot sa Sinulog grand parade ang LGU agi usab ug pasalamat sa mga naangkon nila nga kalampusan sa miaging tuig.
Nipadayag ug dakong kalipay si Consolacion Mayor Teresa “Nene” Alegado sa pag-kampeyon sa ilang contingent nga gipadala sa free interpretation category sa Sinulog ritual showdown 2019, nga mao ang Tribu Malipayon.
Ang Tribu Malipayon unang nilangkat sa 3rd place sa Sinulog sa Kabataan sa Lalawigan niadtong Enero 12.
Gilangkuban kini sa mga tinun-ang dancer gikan sa Pulpogan National Highschool, Consolacion National Highschool ug Tayud National Highschool sa maong lungsod ug mga propsmen nga sakop sa Alpha Kappa Rho Consolacion Chapter.
Wala magdahum si Alegado nga maangkon nila ang 1st place sa kompetisyon ug matod niya, igo lang sila nga nihalad ngadto sa Balaang Bata tungod sa daghang achievement nga naangkon sa ilang dapit sa miaging tuig. (AZLG)