ANG Philippine Drug Enforcement Agency (PDEA) Central Visayas nag-imbestigar sa mga taho nga usa ka 19 anyos nga dalaga namatay sa “drug overdose” sa dihang nitambong sa usa ka concert niadtong Sabado, Enero 19.
Ang PDEA nikompirmar sa SunStar nga nakadawat sila og tawag gikan sa kapulisan nga usa ka babaye ang natumba sa concert sa Plus63.
Mga sakop sa PDEA, kapulisan ug mga sundawo didto sa venue sa concert aron pagbantay sa dapit. Ang Plus63, usa ka tinuig nga music and arts festival, gipahigayon niadtong Sabado sa gabii, Enero 19, sa grounds sa Cebu Business Park atol sa Sinulog festival.
Si PDEA spokesperson Leia Albiar-Alcantara niingon nga nipadala sila og K9 dog sa dapit sa wa pa ang concert aron pagsusi.
Nasayod lang sila sa kamatayon sa dalaga, giila nga si Ashley Abad, sa Lunes na. Nikatap sa social media ang nahitabo ni Abad, 19, kinsa gikan sa usa ka pribadong tunghaan.
Nagpadayon ang imbestigasyon sa hitabo.
Ang hepe sa Mabolo police station, Chief Inspector Dindo Juanito Alaras niangkon nga nakadawat silag report apan wa pa moduol kanila ang pamilya kon unsa ka tinuod nga illegal nga drugas nga Ecstasy ang nakaingon niini.
Apan iyang gitug-an sa Superbalita Cebu nga mohimo sila og imbestigasyon.
“Wala may blotter. Wala pud miari ang complainant nga nag-report sa incident. Pero ako sa na i-coordinate pa sa organizer kon naa man gyud. Lisod man mo-comment ko nga wala tay basihan,” matod ni Alaras.
Si Alcantara niingon usab nga wa pa matino kon unsay namatyan ni Abad.
“Dili pa ta ka conclude kon Ecstasy ba gyud siya kay naa man guy other form sa dangerous drugs kay dili ra man ang Ecstasy ang dangerous drugs. So, subayon gyud nato og diin pud gikan,” pasabot ni Alcantara sa Superbalita Cebu.
Gitinguha sa PDEA 7 nga makakuha og sa death certificate aron matino kon unsay hinungdan sa kamatayon ni Abad.
NATUMBA
Si Perl Jacalan, concert organizer spokesperson, niingon nga ang dalaga natumba sa concert nianang mga tungang gabii.
“Around midnight on the event day, our medical team was sought after the woman collapsed at the VIP deck area. Our on-site doctor immediately decided to bring her to the nearest hospital, Perpetual Succour Hospital,” siya niingon.
Matod niya nga upat ka mga ambulansya nga dunay mga doktor ang diha sa dapit dihang natumba ang babaye.
“We had medical team and they were able to provide medical assistance. The doctor immediately made a call and she was brought to the hospital just minutes after she collapsed,” siya niingon.
Ang babaye gidali pagdala sa Perpetual Succour Hospital lapas sa tungang gabii sakay sa usa sa mga van, apan namatay siya pasado alas 3 sa hapon sa Dominggo, Enero 20.
Si Jacalan niingon nga ang mga ambulansya gibutang sa concert venue aron pagtubag sa mga emerhensya tungod sa kadaghan sa mga tawo nga manan-aw sa concert.
“The organizer really did due diligence...We express our deepest sympathies to the family,” matod ni Jacalan. (Dugang taho sa SunStar Philippines)