MISAAD na matod pa ang pamilya niadtong 19- anyos nga dalaga nga tinun-an sa usa ka pribadong unibersidad sa syudad sa Sugbo nga namatay sa drug overdose atol sa party nga mo kooperar na sila sa himuon nga imbestigasyon sa kapulisan.
Matod ni Police Regional Office 7 Chief Supt. Debold Sinas nga ilang gi awhag ang pamilya labi na ang mga ginikanan nga mo dusog reklamo sa police aron masayran unsay hinungdan sa kamatayon sa ilang kabana nga ni Ashley Abad.
Iya usab nga gihangyo nga hatagan ang mga imbestigador ug pagtugot nga mahiling nila ang lawas sa biktima alang sa himuon nga autopsy.
Gipasabot sa heneral nga dili ordinaryo nga medical doctor ang makahimo sa autopsy sa lawas sa usa ka biktima.
“We encourage the parents that to submit the complaint, kay kung dili sila mag complaint dili man namo mahibaw-an, tapos give us access to the body to autopsy nato para ma check nato ang cause sa death. Dili man ang ordinary medical doctor ang mubuhat ana, forensic doctor kanang pwede mag autopsy,” matod ni Sinas.
Ipatawag usab ni Sinas ang event organizer sa concert sa Plus63 niadtong sabado sa gabii Enero 19 kung hingpit na nga makaduso sa ilang reklamo ang kabanay.
Lakip sa ilang susihon kinsa ang naghatag sa illegal nga drugas kang Abad aron mapaubos nila kini sa imbestigasyon.
“Tapos pangutan-on pa nato kinsa kauban niya because we will be asking kung kinsa toy kauban because didto ta magsugod sa investigation” dugang ni Sinas.
Ang Philippine Drug Enforcement Agency 7 lakip na ang Cebu City Police Office milusad na sa pakisusi sa maong insidente.
Si Leia Alcantara information officer sa PDEA-7 miangkon nga aduna nay kamandoan nga gipagawas ang ilang labaw nga sugdan na ang imbestigasyon.