SECTIONS
Monday, April 22, 2019
SUPERBALITA CEBU

Pusher, ex-barangay councilor nangasikop

SIKOP. Gipresentar sa kapulisan si Geofrey Broñola alyas Hamsa, kanhi blocktimer sa radyo, ug ang unom ka rifles nga gisakmit kaniya kay wala kini mga permit. (Tampo)

NAILHAN nga drug pusher sa dan A. Lopez sa barangay Labangon, syudad sa Sugbo nadakpan ug nakuhaan og 250 grams sa gituohang shabu nga mokantidad sa P1.7 million.

Ang nadakpan mao si Allan Cabatino Lopez, 53, taga Barangay Baliwagan lungsod sa Balamban alas 6:30 gahapon sa buntag.

Ang maong operation pinasikad sa search warrant nga giisyu ni Judge Leopoldo Cañete sa RTC Branch 10 sa lungsod sa Barili.

Matod ni Sr. Insp. Alejandro Batobalonos, team leader sa Provincial Drug Enforcement Unit (PDEU) sa Cebu Provincial Police Office (CPPO), nakakuha sila og report labot sa illegal nga kalihukan ni Lopez sa maong barangay.

Si Lopez, matod pa, usa usab ka blocktimer sa radio.

Giingong ang iyang area sa pagpamaligya mao ang A. Lopez ug sa Barangay Tisa apan ang barangay Baliwagan maoy iyang tagoanan.

Matod pa, nibalhin kini og puyo sa lungsod sa Balamban tulo ka tuig na ang nakalabay apan mag-estambayan kini sa A. Lopez.

“Ang iyang duwa ana is Tisa ug A. Lopez, kay taga A. Lopez man gyud ni siya. Ang iyang asawa maoy taga Balamban mao to namalhin daw nig puyo pero ang iyang distribution sa A. Lopez gyud,” matod ni Batobalonos.

Lakip sa nakuha sa kapulisan ang usa ka improvised shotgun nga adunay tulo ka bala niini.

Samtang nadakpan usab sa maong operation pinaagi sa laing search warrant batok sa kanhi konsehal sa barangay Baliwagan nga nagtiner og armas nga walay lisensya.

Ang dinakpan mao si Alfonso Lim Buot, 53, nga nakuhaan og usa ka calibre 45 ug tulo ka bala.

Gitug-an ni Batobalonos nga wala sila makadawat og report nga mamaligyag drugas si kanhi konsehal Buot apan giingong protector kini ni Lopez sa iyang illegal nga negosyo. Ang asawa ni Buot kasamtangan nga konsehal sa Barangay Baliwagan.

Samtang sud lang sa pito ka oras nakasakmit na usab ang team ni Batobalonos og unom ka mga armas nga walay lisensya sa sitio Katutay, Barangay Kan-abohon, lungsod sa Ronda.

Ang target sa search warrant nga giisyu gihapon ni Judge Leopoldo Cañete sa Barili mao si Geofrey Bulante Broñola.

Nakuha sa kapulisan ang usa ka 22 magnum revolver nga adunay siyam ka bala, duha ka 22 calibre rifle ug tulo ka airgun rifle ug duha ka airgun magazine.

Ang mga dinakpan naa na sa kustodiya sa kampo sa kapulisan sa probinsya sa Sugbo alang sa pagpasakag kaso sa korte.

Matod ni Sr. Insp. Batobalonos nga ang mga airgun kinahanglan nga adunay permit gikan sa Firearms Explosive Office sa Police Regional Office 7 sama sa air soft nga samag hulagway sa tinuod nga armas.

Mahimo nga makapyansa si Broñola sa iyang paghupot sa mga armas nga walay permiso. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!