SECTIONS
Monday, May 27, 2019
SUPERBALITA CEBU

Diputado: Laing kagubot na sab

Cuentas Claras

DUNAY duha ka dagko nga mga problema nga sungsungon karong umaabot nga mga adlaw.

Una, giaprobahan na sa mga senador ang budget para sa 2019 nga dunay dakong kausaban sa gihimo nga balaodnon sa House of Representatives. Siyempre, dili gyod malipay ang taga House nga giusob ang ilang giplano nga balaodnon.

Kon moabot na kini sa bicameral conference committee, segurado nga bibo gyod ang panaglalis sa mga senador ug sa mga sakop sa House of Representatives bahin sa kausaban.

Ikaduha, giaprobahan na pod ang planong balaodnon didto sa House of Representatives nga i-us-os ang criminal liability sa usa ka tawo gikan sa edad nga 15 ngadto sa 9.

Daghan ang miuyon, daghan sab ang misupak didto sa senado

Buyno, nagkasinabot ang mga senador nga angay na gyod nga i-us-os ang edad. Wala lang sila magkasinabot og unsa nga edad dapat us-usan.

Nganong problema man kining planong pag-us-os sa criminal liability gikan sa 15 ngadto sa 9?

Tungod kay nahimo man kining isyo sa gubat batok sa druga. Ang mga menor edad gigamit sa mga kriminal paghimo sa krimen sanglit luwas man sila sa kaso.

Tungod kay kadaghan na mahitabo nga mga menor edad naghimo og krimen sama sa panglugos o pagpatay apan dili sila makasohan kay tungod sa balaod nga gusto usbon karong panahona.

Ang pangutana mao kini – makasulbad ba sa maong problema kon i-us-os ang criminal liability gikan sa 15 ngadto sa 9?

Sanglit tukion pa man sa senado ang maong planong balaodnon, dili pa nato mahibaw-an karon og unsa gyod kaha ang mahitabo sa maong plano.

Igo na nga naukay ang mga katawhan tungod sa maong plano og segurado nga init ang maong isyo kalabot sa umaabot nga piniliay karong bulan sa Mayo.

Buyno, giklaro ni PRRD nga pabor siya nga usbon ang maong balaod nga gipangamahan ni Senador Kiko Pangilinan. Pasabot, kon makapasar na kini sa bicam, dako og posibilidad nga pirmahan gyod kini ni PRRD.

Daghan ang natingala sa ubang mga kaparian.

Kadaghan na balik-balika sa Santo Papa ang mga “lagda” bahin sa paghatag og homily sa mga kaparian.

Matod pa sa Santo Papa, dili tas-on ang homily og angay mag-preparar ang mga kaparian sa ilang isulti aron dili mogawas nga “boring” paminawon.

Apan naunsa man kining ubang mga pari, padayon man lang gihapon paghatag sa labihang taasa nga pagwali unya klaro ra ba kaayo nga wala magtuon daan sa iyang isulti. Bisan unsa lay masulod sa hunahuna ang isulti.

Daghan kanila, makamao mosugod apan halos di kamao moundang.

Ang nakapait ra ba kay human sa pagpangalawat, mohatag na pod og ikaduhang homily sa dili pa mohatag sa “final blessings.”

Kasagaran, adto kini sa mga kalungsoran mahitabo sanglit kaduha o katulo lang sa usa ka adlaw mag-misa didto og dili parehas sa mga siyudad nga halos kada oras dunay misa.

Walay mahimo ang mga tawo og mag-agwanta na lang. Mao kini hinungdan nga kasagaran mahitabo, mawala na lang ang focus sa pagsimba tungod sa abuso sa mga kaparian.

* * *

Unsa gyod kahay rason nga dili man parehas ang pagsunod sa patakaran sa paghatag og homily?

Ngano kaha nga ang ubang mga kaparian mosunod samtang ang uban dili man.

Pwede ba diay nga maghimo lang sila og ilang kaugalingon nga patakaran?

* * *

Dunay posibilidad nga mausab ang patakaran sa pagpalit og mga sakyanan.

Matod pa sa akong nasagap nga balita, ang Procurement Service (PS) ubos sa DBM mao nay mopadagan sa pagpalit og mga sakyanan og igo lang kini ihatag sa mga angay modawat niini.

I-centralized na kuno ang pagpamalit sa mga sakyanan, dili na ang procuring agency ang mopalit o mopa-bid.

Maayo ba kaha kini nga paagiha?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!