PILA na ka tuig nga gipaningkamotan sa PaDayon Pilipino nga unta mas mapalapdan ang ilang pagserbisyo pinaagi sa pagpapili isip party list sa nasod.
Nahatagan kini og katumanan human sa hingpit ang Commission on Election (Comelec En Banc) nagatugot nga mamahimong party list ug anaa sa ika #152 ang Ako PaDayon Pilipino sa listahan sa magpapili sa umaabot nga piniliay karong tunga-tunga sa tuig 2019.
Kini human nakita nga matarong ug dunay maayong katuyoan sa matubag ang gikinahanglang programa ug proyekto alang kabus ug mga nagkinahanglan.
Ang #152 Ako PaDayon Pilipino, basi sa hukom sa Comelec En Banc Resolution, napamatud-an nga nag-representar kini sa marginalized sector, susama sa laborers, informal settlers, katigulangan, ug mga indigenous communities.
Si Misamis Oriental Governor Yevgeny Vincente Emano nalipay niini nga kalamboan sa ilang partido tungod sa pila ka katuigan ubay-ubay na karon nga mga pulitiko ang nagikan gyod niini nga partido nga karon mibiya na, apan daw pabiling nibarog kini nga partido.
Nagpasalamat sab kini sa iyang amahan nga si kanhi mayor Vicente ‘Dongkoy’ Emano nga mao ang founder niini nga usa sa pangandoy niya ang marekognisar kini.
Ang partido adunay moabot na ngadto sa 200,000 ka membro sa tibouk pulo.
Kung mahatagan sa higayon nga makalingkod sa hawanan sa kongreso mas mapalapad pa ang serbisyo nga mahatod dili lang dinhi sa probinsya sa Misamis Oriental, apan lakip sa tibouk nasod.
Una na nga giingon ni Emano nga mapaubsanon ang partido ug dili kabalo manghasi, dili kabalo mangdaot, ug karon nagbunga ang ilang pagpaningkamot ug gani ang ilang mga kaatbang na karon nga kanhi miyembro sa partido ang wala nila gitudloan sa pagpangdaot.
“Wala madungog nga ang Partido PaDayon Pilipino ang nanghasi o nigamit og bahandi kay sayod ang tanan kami sa partido, ang pinakapobre nga partido, ug wala namo gigamit among gahom aron pagsakmit sa kadaogan,” matud niini.
“Kana among kaatbang among kauban kaniadto wala namo sila tudlui sa pagpanikas ug sa taliabot nga piliay mogamit sa bahandi sa piliay sa pagpanghadlok. Sila nasayod nga wala na sukad nahitabo sa Partido sa padayon Pilipino,” dugang niini. (SVB)